Eth Conselh Generau d’Aran e es societats dera Val d’Aran “Societat de Caça e Pesca Val Aran” e “Societat de Caça e Pesca Naut Aran” signèren un convèni de collaboracion en matèria de caça e pesca en vertut deth quau s’establie era volontat deth Conselh articular un modèu de collaboracion entre era Administracion Publica competenta ena gestion dera activitat piscicòla, conservacion e recuperacion des arrius e lacs existents laguens deth territòri, en tot articular es societats coma ENTITATS TUTORES DERA PESCA (cossent damb çò qu’establís er article 49 dera Lei 22/2009, de 23 de deseme, d’Ordenacion Sostenible dera Pesca en Aigües Continentaus), damb foncions, entre d’auti airaus, de collaboracion damb es agents de miei ambient deth Conselh Generau d’Aran enes prètzhèts de vigilància e contròtle des arrius, e en aqueres actuacions amiades a tèrme peth Conselh, e que siguen de besonh (com entara repoblacion, pesques electriques e traslocacions…).

En aguest sens, es Societats collaboraràn damb eth personau tecnic deth Conselh ena realizacion d’actuacions e activitats de gestion dera pesca e proteccion des ecosistèmes coma sauvaments de fauna, actuacions de mielhora e restauracion der abitat, estudis entara conservacion, promocion e restauracion dera fauna aqüicòla e des espècies autoctònes, realizacion des inventaris e contròtles de fauna aqüicòla, eca.

De hè ans, era Societat de Caça e Pesca dera Val d’Aran a desvolopat era activitat de reproduccion d’alevins damb trueita autoctòna dera Val d’Aran provenienta der arriu Garona. Es alevins produsits an estat utilizats entara repoblacion des arrius de nauta e baisha montanha dera Val d’Aran, damb un resultat fòrça satisfactòri.

Era experiéncia positiva dera produccion d’alevins pendent ans, recomane potenciar aguesta activitat, e mès en moment actuau que coma conseqüéncia dera grana avenguda patida ena conca der arriu Garona eth passat 18 de junh deth 2013, era densitat dera fauna icticòla s’a vist grèument afectada.

Damb era finalitat d’impulsar era recuperacion dera fauna icticòla, eth sindic d’Aran, Carlos Barrera, eth conselhèr d’Agricultura, Ramaderia e Medi Ambient d’Aran, Jose E. Arró, president dera “Societat de Caça e Pesca Val Aran”, Jacinto Cuny, e eth president dera Societat de Caça e Pesca Naut Aran, Andrés España, an signat un convèni de collaboracion entath foncionament dera Piscifactoria dera Val d’Aran ara fin de dar continuïtat ara madeisha.