Vielha, 7 de hereuèr de 2018.- Eth Conselh Generau d’Aran a trauès deth Centre de Prediccion de lauegi dera Val d’Aran e en collaboracion damb Baqueira Beret, organize entre es dies 5 e 8 de hereuèr de 2018 un cors auançat de rescat en lauegi entà formadors, impartit per un des melhors especialistes a nivèu mondiau en tecniques de rescat en lauegi coma ei Manuel Genswein, damb er objectiu que se poguen premanir entà actuar coma formadors d’auti tecnics e professionaus en aguest àmbit de trabalh.

En cors qu’ei orientat a personau damb ua longa experiéncia en rescat, s’abordaràn es naues tecniques incorporades recentaments en rescat de lauegi a nivèu mondiau.

Eth cors aurà ua vessant teorica e auta practica en sessions de maitin e tarde, entà aprigondir en tematiques coma eth rescat organizat en scenaris multi victima, damb er objectiu de optimizar es procediments. Era darrèra jornada deth dijaus se destinarà ara metuda en practica en Baqueira Beret dera formacion arrecebuda e des coneishements aqueridi damb era supervision der expèrt Manuel Genswein. Aguest especialista collabòre damb equipes de rescat europèus e americans ath delà d’èster un des especialistes en rescat ena CISA-IKAR organisme internacionau de referéncia e desvolopador deth sistèma de paleo de “cinta transportadora en V” qu’a estat adoptat pera majoria de grops de rescat e centres de formacion.

Pendent aguesti dies participaràn tecnics deth Conselh Generau d’Aran, des Pompièrs d’Aran, de Baquiera Beret, CRS e PGHM, Guides de Nauta Montanha dera Val d’Aran e especialistes dera Gendarmería Francesa.

Eth dimèrcles 7 de hereuèr as 19 ores, Manuel Genswein, qu’actuauments trabalhe en projècte Mountain Safety, aufrirà ua charrada dubèrta ath public en EraAudiovisuau de Vielha.

Contenguts deth cors: Curs allaus