Vielha, 13 de junh de 2017.- Era Escòla de Tecnics Esportius dera Val d’Aran (ETEVA) prepause dus corsi, un de monitor e er aute de director d’Educacion en Temps Léser infantil e juvenil.

Eth cors de monitor en temps léser, consistís ena formacion que prepare ar alumnat entà intervier de forma educativa enes activitats de temps léser infantil e juvenil, e que capacite entà dinamizar e avalorar activitats d’òci en marc dera programacion generau d’ua organizacion, en tot aplicar tecniques especifiques d’animacion grupal, era educacion en valors e coneishements basiques de seguretat e prevencion de risqui.

En cors de director de temps léser, era formacion aquerida capacite entà planificar, organizar, gestionar, dinamizar e avalorar projèctes d’òci infantil e juvenil, atau coma eth contròl e era dinamizacion des equipes de monitors. Eth cors se dirigís a persones majors de 18 ans.

Es titolacions de temps léser autorizen a exercir de monitor o director de colònies, casaus, campaments, rotes, camps de trabalh.

Totes aqueres persones interessades pòden consultar dates e prètzi en informacion@eteva.org o en telefòn 973 644 595.

Mès informacion en http://www.eteva.org/