Vielha, 23 d’abriu de 2018.- Eth Plen deth Conselh Generau d’Aran amassat en session extraordinària, acordèc aué 23 d’abriu per unanimitat, era aprobacion provisionau dera modificacion des Nòrmes Subsidiàries de Planejamnet relatives ara regulacion dera preservacion e recuperacion des bòrdes e cabanes en solèr non urbanizable, entà adaptar-les as determinacions deth vigent Plan Director Urbanistic dera Val d’Aran.

Ar inici dera legislatura der an 2011, eth Conselh Generau d’Aran amassa damb era direccion generau d’Urbanisme dera Generalitat de Catalonha, inicièren eth trabalh d’adaptacion des Nòrmes Subsidiàries complementàries Urbanistiques dera Val d’Aran ath nau PDU d’Aran.

Dempús de fòrça reünions tecniques s’acordèc per consensus era definicion d’emplec ludic familhau, entà motivar dus aspèctes fonamentaus en çò que representen es bòrdes e cabanes de montanha, coma patrimoni culturau e economic, en tot arrebrembar sègles enreire, e er emplec de pervivéncia qu’aguestes edificacions representauen entara economia des familhes, en tot perméter eth profitament agricòla e pagés de nauta montanha.

Evidentaments, es tempsi an cambiat, e per açò calie trobar ua figura que permetesse legauments as proprietaris, poder mantier, conservar o rebastir era sua proprietat (bòrda o cabana). Des der inici des tramits d’aguesta adaptacion normativa d’edificacion en solèr rustic d’activitats economiques non tradicionaus, era Generalitat de Catalonha, aprovèc en 2012 era Lei ómnibus, que permetie fixar activitats economiques non tradicionaus en solèr non urbanizable.

Eth Conselh Generau d’Aran, inicièc ua seria de reünions damb toti es ajuntaments aranesi, entà acaptar era implantacion des activitats permetudes pera Lei ómnibus en solèr rustic dera Val d’Aran.

Es tramits entà arribar a un consens unitari enes critèris qu’aué s’an sometut a aprobacion provisionau en Plen deth Conselh Generau d’Aran, an estat frut de dus aspèctes fonamentaus:

Eth prumèr, era volontat unanima de hèr possible ua solucion legau ath conflicte qu’afectaue a un gran nombre de proprietaris, qu’auien intervengut ena sua bòrda o cabana, sense auer cap cobertura legau, e dusau, atau madeish pacificar sociauments aguest problèma, que non a arren que veir damb es edificacions de naua planta bastides a compdar der an 1969 en municipi de Naut Aran, e er an 1982 en rèste de municipis aranesi. Aguesti ans, son es quaus mèrquen eth critèri d’edificacion preexistent abans dera aprobacion dera prumèra figura d’organizacion urbanistica.

Tot aguest trabalh de regulacion finalizarà damb era aprobacion definitiva dera adaptacion urbanistica des Nòrmes Subsidiàries e de Planejament ath Plan Director Urbanistic d’Aran, en eth sí dera Comission d’Urbanisme deth pròplèu dia 27 d’abriu.

En aguest procès es ajuntaments an incorporat ua ficha, en tot fixar aqueres edificacions bastides en solèr rustic que des de hè ans mantien ua activitat economica non tradicionau. A compdar d’ara, aguestes activitats auràn de legalizar-se mejançant un Plan Especiau Urbanistic, sollicitat pes proprietaris e aprovat iniciauments per ajuntament corresponent.

En çò que tanh ara figura de profitament ludic familhau en marc dera conservacion, melhora o reconstruccion, serà tostemp qu’es rèstes que demoren dera edificacion demostratz claraments coma era antiga existéncia d’uns espacis interiors qu’en cap cas poderàn èster assimilables as d’un abitatge. En aguest sens, aqueri proprietaris qu’agen realizat òbres de distribucion ath laguens de bòrdes o cabanes que siguen assimilables as d’un abitatge auràn de retornar er interior dera edificacion as condicionaments que s’aprovaràn en sí dera Comission d’Urbanisme, ei díder, ar esperit e finalitat der emplec ludic e familhau.

Ath finalizar eth Plen, eth sindic d’Aran, Carlos Barrera, a destacat era importància deth trabalh realizat des deth Conselh Generau d’Aran, amassa damb es ajuntaments aranesi e era Generalitat de Catalonha, entà trobar ua solucion a ua situacion que pendent fòrça ans a angoishat a fòrça familhes araneses proprietàries de bòrdes e cabanes.

Es modificacions des Nòrmes Subsidiàries de Planejament Urbanistic de regulacion dera preservacion e recuperacion des bòrdes e cabanes en solèr non urbanizable, seràn aplicables enes municipis d’Arres, Bausen, Bossòst, Es Bòrdes, Canejan, Les, Vielha e Mijaran, Vilamòs, e Naut Aran.