Vielha, 18 de deseme de 2017.- Annaument des de Musèus dera Val d’Aran se prepause ua tematica especiau, entorn ara quau viren moltes des activitats, exposicions e actes programadi. A trauès d’aguesti tèmes annaus se preten commemorar o méter en valor bèra causa, fenomèn o personalitat.

Pendent aguest 2017, era Gastronomia a estat era grana protagonista en Musèus dera Val d’Aran, en tot dedicar 9 projèctes que compartissen aguesta tematica. Er objectiu de fusionar gastronomia e musèus respon ara volontat d’apropar es musèus ara societat, a trauès d’un tèma quotidian coma ei eth minjar. Darrèr de tota accion, enes musèus i a tostemps era intencion de qu’es visitants aprenguen a trauès dera experimentacion en prumèra persona e d’elements que les resulten familiars.

Des 9 accions amiades a tèrme pendent er “An dera Gatronomia” destaquen dues exposicions (Exposicion Collectiva d’Artistes d’Aran e Paisatges ena Taula); dus talhèrs familiars (Nhacs Artistics e Pinchos Artistics); atau coma eth dejà assolidat Dia Internacionau dera Poesia, ua serada poeticomusicau damb eth minjar coma protagonista des poèmes. Era nauetat d’enguan an estat es eveniments teatralizats, amiats a tèrme en Ecomusèu Çò de Joanchiquet e Sant Joan d’Arties, damb un gran nombre d’assistents e public majoritàriament locau.

“Eth sopar deth governador”, sopar teatralizat que simule un banquet deth sègle XVII en Sant Joan d’Arties, ei ua des sensacions d’aguest deseme. Aguesta setmana gesseràn es entrades ara venta per auança en Musèu dera Val d’Aran entara foncion deth 29 de deseme. Entàs mès petiti, eth governador tanben les convidarà a vrespalhar en St Joan d’Arties eth dia 4 de gèr. En aguest cas, serà ua activitat gratuïta mès damb aforament limitat.

Era màger part d’aguestes activitats an estat finançades per Institut d’Estudis Ilerdencs (Deputacion de Lhèida), gràcies ara subvencion concedida a Musèus dera Val d’Aran, destinada as activitats de 2017.