Era configuracion arquitectonica dera glèisa de Cap d’Aran arrespon ath canon dera arquitectura romanica, ei a díder, ei ua bastenda de planta basilicau de tres naus, damb vòuta de canon e cabeçada per tres absides. Dempús dera restauracion, amiada a tèrme en an 2001, s’an metut de manifèst es diuèrses etapes de bastiment. De hèt, s’intuïssen coma minimom dus en.honsaments des vòutes. Un detalh qu’evidéncie aguesta succession de collapses estructuraus, ei eth reprofitament continu de materiaus de construccion, que se pòt observar en bèri ambits com es hièstres, era portalada e es absides.

Era glèisa de Santa Maria de Cap d’Aran de Tredòs presente dues caracteristiques insolites respècte dera rèsta deth patrimòni eclesiastic dera Val d’Aran: era preséncia d’ua cripta ena part inferiora der autar e er emplaçament dera tor campanau apartada deth còs dera bastenda religiosa. Era cripta cònste de dus espacis, un de rectangular e un aute de semicircular, separadi per un arc de miei punt adovelat.
Respècte ara tor campanau, maugrat que se consèrve era base deth que dilhèu ère eth campanau originau romanic, era rèsta deth còs dera actuau tor siguec bastit en epòques posteriores.

Finaument cau remercar qu’era glèisa de Cap d’Aran dispausaue d’ues pintures muraus romaniques que s’atribusissen ath cercle deth Mèstre de Pedret, deth torn des sègles XI e XII; aguestes pintures sigueren arringades e amiades dehòra dera Val d’Aran e, actuaument, era part mès importanta deth conjunt se pòt veir en musèu The Cloisters de Naua York.