Des der Airau de Patrimòni Culturau deth Conselh Generau se trabalhe entà activar ua naua web foncionau e dinamica estructurada en cinc apartats: competéncies deth Conselh Generau d’Aran, proteccion deth patrimòni culturau, documentacion e investigacion, conservacion e restauracion e difusion e formacion.
En prumèr lòc, er objectiu ei hèr a conéisher e difóner era grana riquesa e varietat d’elements d’interès istoric, artistic, etnologic e arqueologic que compòsen eth Patrimòni Culturau dera Val d’Aran.
Un element remercable laguens deth patrimòni culturau aranés ei eth representat pes glèises, majoritàriament aqueres que pertanhen ara arquitectura romanica e gotica, e qu’ath delà en sòn interior aubèrgen un legat artistic d’ua varietat e riquesa excepcionaus, de diferenti genres artistics –escultura, pintura, orfebreria e textils – e estils – romanic, gotic, renaishentista o barròc.
Aguest legat conten òbres de grana qualitat artistica com eth Crist de Mijaran (fòto) o eth de Salardú, Escunhau o Casarilh (fòtos), emblematiques tara escultura romanica de husta: conjunts subergessents com es d’Arties, Salardú, Unha, Bossòst o Vielha (fòtos) e tanben un gran nombre d’edificis e òbres mès modèstes qu’ath marge d’aguesti constituïssen un document istoric de prumèra man, en tot perméter ath visitant submergir-se en ambient, circonstàncies e creences d’aqueri que les dèren vida.
Ath delà, non podem desbrembar es imponents campanaus, que damb es sòns tets punchents presidissen es pòbles aranesi.
Era Rota Romanica d’Aran permet gaudir dera visita guidada des 15 glèises mès destacades.
De forma progressiva, es usatgèrs disposaràn d’informacion relacionada damb es Bens Culturaus d’Interès Nacionau (BCIN’s), Es Bens Culturaus d’Interès Locau (BCIL’s) e es bens sense catalogar. Tanben se daràn a conéisher estudis monografics restacadi (inventari de campanaus e campanes e inventaris de mòles e ressècs)
Tota aguesta informacion s’adrece a un ample ventalh d’usatgèrs entà satisfèr besonhs ben diferenti: des de tramitar ua licéncia o redactar un projècte enquiara elaboracion d’estudis e trabalhs d’art o d’istòria, era preparacion d’un viatge toristic o simplament era actualitat d’actes, corsi o actuacions en patrimòni culturau dera Val d’Aran.
Tà comentaris e suggeréncies podetz contactar damb nosati en:
