Vielha, 25 de mai de 2018.- Eth Conselh Generau d’Aran, a trauès dera enterpresa Servicis Ambientaus dera Val d’Aran (SAVA S.L.), a daurit enes darrèri dies es pistes forestaus d’accès as paratges naturaus mès emblematics dera Val d’Aran, coma son era pista forestau dera Artiga de Lin, daurida ja hè quauqui dies e era pista forestau d’accès ath Saut deth Pish (Varradòs), ara que ja se pòt accedir a compdar d’aguesta dimenjada.

Eth Govèrn d’Aran a trabalhat damb maishines entara canalizacion der aigua e era extraccion de materiau acumulat coma branques d’arbes e pèires. Es manòbres an trabalhat en lauar e desbrossar de manèra manuau entà retirar es rèstes produsides pera nhèu o eth desgèu.

Eth conselhèr d’Agricultura, Ramaderia e Miei naturau d’Aran, José Enrique Arrò, a explicat que damb era dubertura des pistes forestaus se garantís er accès des persones as paratges mès concorrudi d’Aran. En cas dera pista d’accès ath Saut deth Pish peth moment sonque ei possible arribar enquia aguest punt, donques era grana acumulacion de nhèu en aguesta zòna, qu’arribe ath miei mètre de nhèu, hè impossible encara er accès des deth Saut deth Pish en desús. José Enrique Arrò a dit qu’era dubertura dera rèsta dera pista se harà de manèra graduau a mesura que se produsisque eth desgèu, per çò qu’a recomanat precaucion a totes aqueres persones que volguen accedir as zònes mès nautes dera Val d’Aran.

En aguest sentit cau arrebrembar qu’er ostiu passat eth Conselh Generau d’Aran realizèc es òbres de reconstruccion dera pista dera Artiga de Lin, en tram ara nautada deth barranc de Geles afectat pes aiguats deth 2013 e era recuperacion deth tram entre eth Camin de Soberado e eth guardader der aigua, er ancien camin d’accès ara Artiga de Lin, que auie grana quantitat de vegetacion damb pèires queigudes des murs e erosionat per aigua. S’i bastic un accès en camin des deth parcatge dera Artiga de Lin, quate passarèles entà crotzar es barrancs d’Aubert e de Bernatet e dera hònt existenta, ath delà de reperfilar eth camin desbrossant era zòna entà dar-li ua amplada de 1,20m, e eth bastiment de parabandes de seguretat ath long de tot eth camin e ath guardader der aigua.

Eth Govèrn d’Aran trabalhe egalaments ena mantenença e premanida dera rèsta de pistes forestaus dera Val d’Aran coma es d’Aiguamòg, Valarties o Varicauva entre d’autes de cara ara sason toristica de primauera e ostiu.