Vielha, 25 de seteme de 2017.- Eth Sr. Sergio Coll Plà, professor e arquitecte dera Escola Superior d’Arquitectura dera Universitat Rovira i Virgili a lièjut e defensat ua tèsi importatissima sus es glèises deth prumèr romanic dera Val d’Aran damb eth nòm d’ “Estudi des glèises en cornaenclinc de vòutes escarramingades” hènt enfasi e explicant aguestes construccions lèu sense angles rectes, (estant lèu toti aguts o obtusi –d’aquieu era paraula cornaenclinc-) e de vòutes –escarramingades- ei a dider dubertes degut ara fòrça des vectors de possament des vòutes bastides de forma posterior as charpantes sus es parets.
Foto: Mónica López Piquer
Era tèsi a estat codirigida peth Dr. Josep Lluís e Ginovart (Dean of School of Architecture of UIC Barcelona) e eth Dr. Agustí Costa i Jover (Professor e investigador dera Escòla d’Arquitectura dera Universitat Rovira e Virgili).
Eth tribunau a estat format peth Dr. Joaquín Ruiz de Arbulo Bayona (Catedratic d’Arqueologia de Grècia e Roma dera Universitat Rovira e Virgili), eth Dr. Albert Samper Sosa (Investigador e professor de geometria dera Escòla d’Arquitectura dera Universitat Rovira e Virgili) e eth Dr. Pedro Casariego Vals (Sosdirector School of Architecture of UIC Barcelona).
Era tèsi que s’a lièjut e defensat, damb molta afluencia de public e damb era presencia deth Vicari Generau deth Bisbat d’Urgelh, Mossen Josep Maria Mauri e er Archiprèst dera Val d’Aran. Mn. Pere Balagué ei era punta der icebèrg deth gran trebalh hèt lèu durant sies ans pes Escòles Superiors d’Arquitectura dera Universitat Rovira i Virgili e Internacional de Catalunya, per Arquevescat d’Urgelh, pera Glèisa Aranesa, peth Departament de Cultura e Patrimòni e pes Servicis Tecnics deth Conselh Generau d’Aran damb d’auti collaboradors que s’an anant higent a trauèrs deth temps ath projècte.
Eth Vicesindic d’Aran, Luís Carlos Medina, a arregraït era disposicion e valentia qu’ agut era Universitat entà portar un acte tan important e simbòlic entara Val d’Aran, géssent dera madeisha universitat e a vantat en nòm deth Govèrn d’Aran era qualitat excèlsa d’aguesta prumera tèsi damb d’autes, que segur qu’arribaran, en tot assegurar que son importantissimes entà bastir eth nòste expedient entà demanar en quauque moment ara UNESCO de qu’era Val d’ Aran sigue declarada Patrimòni dera Umanitat. Projècte en que trebalhe eth Conselh Generau d’Aran damb era collaboracion der Institut d’ Estudis Ilerdencs e era Deputacion de Lhèida.
