• Enquiath 12 de seteme, eth Conselh Generau d’Aran regularà, pendent es 08:00 e es 18:00 ores, er accès ara Artiga de Lin, Colomèrs, era Ribèra de Varradòs, era Bassa d’Arres, era Bassa d’Oles e era Ribèra de Valarties segontes era afluéncia que i age en aguestes zònes entà evitar massificacions

Eth Conselh Generau d’Aran met en foncionament, a compdar deth 15 de junhsèga enquiath 12 de seteme, es mesures de regulacion ath miei naturau enes zònes damb mès afluéncia pendent er ostiu: era Artiga de Lin, Colomèrs, era Ribèra de Varradòs, era Bassa d’Arres, era Bassa d’Oles e era Ribèra de Valarties. Aguestes mesures s’implementaràn toti es dies entre es 08:00 e es 18:00 ores.

“Un an mès, tornam a implementar diuèrses mesures entà regular er accès as principaus airaus d’interès naturau ena Val d’Aran entà, per un costat, garantir era seguretat des usatgèrs e usatgères d’aguestes pistes e melhorar era sua experiéncia e, per ua auta, preservar aguesti endrets naturaus e evitar era sua massificacion”, afirmaue eth vicesindic e conselhèr d’Economia, Torisme e Promocion Economica, Juan Antonio Serrano, en tot híger que: “damb aguestes mesures volem tanben promocionar entre es nòsti visitants d’auti paratges naturaus mens coneishuts coma alternativa as punts mès emblematics e concorruts pendent aguesti mesi”.

Pera sua part, eth tanben conselhèr d’Economia, Torisme e Promocion Economica, Josep Canut, explicaue que: “aguestes  mesures s’amiaràn a tèrme a trauès de diuèrsi contròls que se plaçaràn en accès ad aguesti paratges e que regularàn eth pas segontes era ocupacion e places liures que i age enes parcatges” e higie que: “a trauès dera plataforma web AparcAran e dera madeisha app toristica GuidAran, facilitaram informacion a temps reau der estat de massificacion d’aguesti punts”.

Aguesta actuacion se desvolòpe en marc deth Plan de Sostenibilitat Toristica dera Val d’Aran, un plan a desvolopar en 3 ans e finançat pera secretaria d’Estat de Torisme, era Generalitat de Catalunya e eth Conselh Generau d’Aram.