• Coma cada an, eth Conselh Generau d’Aran, a trauès dera sua Oficina de Joenessa, prestarà supòrt as estudiants aranesi ena sollicitud d’aguestes ajudes entath cors 2020/2021

A compdar de deman, 23 d’abriu, se poiràn sollicitar es ajudes destinades as estudiants universitaris d’Aran, Alt Pirineu e Solsonès (APA) entath cors 2020/2021. Es ajudes APA se concedissen entara mobilitat e lotjament dehòra dera comarca a on s’a era residéncia familhara e er impòrt maxim dera ajuda ei de 2.000 euròs.

Eth Conselh Generau d’Aran, mejançant era Oficina de Joenessa dera Val d’Aran, darà supòrt ara convocatòria d’aguestes ajudes, des que ne pòden èster beneficiaris es estudiants que complisquen es requisits que seguissen:

Requisits generaus:

• Auer era ciutadanetat de quinsevolh estat membre dera Union Europèa. En cas des estudiants non comunitaris, s’a d’acreditar era sua condicion de residents.
• Residir en Aran, Alt Urgell, Alta Ribagorça, Cerdanya, Pallars Jussà, Pallars Sobirà o Solsonès, coma minim des der 1 de gèr de 2018.

Requisits academics:

• Èster inscrit o inscrita en ua universitat deth sistèma universitari catalan eth cors 2020/2021 en uns estudis presenciaus encaminats ara obtencion d’un títol oficiau de grad.
• Èster matriculat o matriculada en cors actuau de 60 credits, en cas d’inscripcion entath cors complèt, o de 30 credits, enes casi d’inscripcion semestrau, tà cada semèstre.
• En cas de matricular-se d’un nombre inferior de credits, cau aportar ua acreditacion deth centre que justifique que s’a inscrit deth nombre maxim de crèdits d’acòrd damb era organizacion administrativa deth centre. Non se pòden acuélher ad aquera opcion es escolans que, a causa deth sòn rendiment academic enes corsi anteriors, non s’agen pogut matricular en nombre de credits previsti.
• Auer superat eth 80% des credits matriculadi en cors anterior o en darrèr cors realizat en ensenhaments des branques de coneishements d’arts e umanitats, sciéncies, sciéncies dera salut e sciéncies sociaus e juridiques e eth 60%, en cas des ensenhaments tecnics des branques de coneishement d’engenharia e arquitectura.
• Demoren excludides d’aguesta convocatòria es persones qu’agen bèra titolacion universitària superiora, es estudis de màster e especializacions e es persones qu’agen era independéncia familhara e economica dera sua unitat familhara.

Requisits economics:

Non passar es limits de renda familhar e de patrimòni establidi ena convocatòria der exercici fiscau deth 2019.

Sollicitud e Documentacion:

• Document nacionau d’identitat deth/dera sollicitant e de toti es membres computables dera unitat familhau majors de 14 ans.
• Numèro de compde bancari dera persona sollicitant.
• Certificat municipau de convivéncia a on cònste era data d’inscripcion en padron dera persona sollicitant en un municipi des comarques mencionades, aumens des der 1 de gèr de 2018. En cas qu’es persones s’agen empadronat posterioraments calerà aportar justificacion.
• Matricula universitària corresponenta ath cors 2020-2021 damb era acreditacion que s’a hèt efectiu eth pagament. Se s’a optat per matricula semestrau, cau presentar era des dus semèstres.
• Matricula universitària corresponenta ath cors 2019-2020. Se s’a optat per matricula semestrau, cau presentar era des dus semèstres (sonque en cas des persones sollicitantes que non inícien per prumèr còp estudis universitaris eth cors 2020-2021).
• Expedient academic complèt, a on cònsten es assignatures e era convocatòria en qué s’an obtengut, en cas des persones sollicitants que non corsen peth prumèr còp estudis universitaris. En aguest expedient tanben a de constar, de manèra clara, eth totau de crèdits matriculadi e eth totau de credits aprovadi en cors academic 2019-2020.
• En cas des persones sollicitants que corsen per prumèr còp estudis universitaris nòta PAU.
• Enes casi qu’er estudiant non s’age matriculat dera quantitat de credits exigidi pera convocatòria, li cau justificar que s’a matriculat deth nombre maxim de credits d’acòrd damb era organizacion administrativa deth centre o peth motiu de finalizar es estudis.
• Documentacion qu’acredite qu’er estudiant residís dehòra dera residéncia familhau pendent eth cors academic e es recebuts de pagament dera residencia
• Era sollicitud s’a de completar mejançant eth formulari accessible via internet a trauès dera sedença electronica dera Generalitat de Catalonha, ei de besonh certificat digitau.

Entà que cap de joen dera Val d’Aran se quede sense poder participar en aguesta convocatòria, era Oficina Joenessa dera Val d’Aran deth Conselh Generau d’Aran facilitarà era tramitacion d’aguesta linha d’ajut.

Entà sollicitar aguest ajut se pòden adreçar tara Oficina Joenessa dera Val d’Aran damb cita per auança, plaçada en Carrer Major 36, en orari d’atencion ath public: de deluns a diuendres de 08:00 a 15:00 ores. Telefons: 973640625; 680415451. Email: joenessa@aran.org

Eth tèrme entà presentar es sollicituds a trauès dera Oficina de Joenessa ei enquiath pròplèu diuendres 21 de mai de 2021.