• Diuèrsi establiments aranesi expausaràn es sòns productes ena hèira e se realizaràn talhèrs.
Eth Conselh Generau d’Aran organize ua naua edicion dera hèira Aran Market, qu’aurà lòc en Vielha (Passeg dera Libertat) deth 19 ath 21 d’agost. Era hèira preten promòir es diferenti productes des comerçants dera Val d’Aran.
Enguan, 16 establiments treiràn en carrèr es sòns productes entà hèr conéisher era vasta varietat qu’aufrís eth comèrç aranés. En aguest sens, i aurà comerçants de ròba, alimentacion, souvenirs, complements, decoracion, atau coma era preséncia de diuèrsi mestieraus.
“Aran Market poténcie eth comèrç aranés damb era preséncia de visitants ath long des diferentes jornades que dure era hèira” comente era conselhèra de Torisme e Desvolopament Economic d’Aran, Anna Díaz.
Pendent es tres dies dera hèira i auràn estands a on se veneràn es productes. Ath delà, tanben se realizaràn diferenti talhèrs amiadi a tèrme pes madeishi comerçants.
Er orari d’Aran Market serà d’11:00 a 21:00 ores ininterrompudament.
TALHÈRS D’ARAN MARKET
Diuendres, 19 d’agost:
De 17:30 a 19:00 ores:
– Cata de vins, a cargue de Cava Beso
Dissabte, 20 d’agost:
De 17:30 a 19:00 ores:
– Massa de pizza!, a cargue der obrador de La Guinda
– Tractament faciau, a cargue de Termes Baronia de Les
Dimenge, 21 d’agost
De 17:30 a 19:00 ores:
– Maquilhatge infantil, a cargue de Kristina Nart
– Fabrica es tues maraques damb materiau reciclat, a cargue de Dwayna artesania
– Demostracion d’elaboracion de paèrs, a cargue de Tòn Leja
Vielha, 12 d’agost de 2016
Conselh Generau d’Aran: Núria Sanjuan