Vielha, 27 de hereuèr de 2018.- Entre es dies 5 e 25 de març era Val d’Aran viuerà ua naua edicion deth mes deth caviar organizat peth Conselh Generau d’Aran, damb era collaboracion de Caviar Nacarii e eth Grèmi d’Ostalaria dera Val d’Aran.

Eth caviar aranés Nacarii, definit coma era autentica jòia gastronomica des Pirenèus, qu’a obtengut eth reconeishement de codinèrs e gastronòms peth sòn sabor autentic, frescor, puresa e transparéncia, s’includís laguens des productes dera Marca de Garantía Val d’Aran. Procedent des aigües heiredes, pures e cristallines deth desgèu deth Garona, eth caviar Nacarii, s’elabòre de manèra artesanau e damb metòdes tradicionaus ena piscifactoria plaçada en municipi de Les.

Ena edicion d’enguan deth mes deth caviar participaràn es restaurants De Pitona, Era Mòla, Era Coquèla, Eth Molí e Eth Bistro de Vielha, Eth Triton e Pirineu Gourmet d’Arties, Roc’n’Cris d’Aubèrt, La Trastienda en Bossòst, Wellbourne en Salardú, Bòrda Benjamín de Casarilh, Es Arraïtzes en Garòs, e Liat-Hotel Tuc Blanc, Pinchos e tapes Baqueira 1500 e Del Gel al Foc/ Hotel Rafael Hoteles en Baqueira qu’aufriràn es sues prepauses gastronomiques elaborades damb caviar pendent es tres setmanes.

Enes menus i serà present eth caviar e tanben er esturion codinat damb era creativitat des chefs aranesi, a on non mancaràn es pròstres elaboradi damb caviar.

Eth programa deth mes deth caviar ena Val d’Aran, va mès ath delà des prepauses gastronomiques e includís ua seria d’activitats complementàries que van des d’ua visita ara piscifactoria deth caviar Nacarii enquiara possibilitat de gaudir des tractaments elaboradi damb caviar deth balneari des Termas Baronia de Les.

Trobaratz era informacion detalhada deth mes deth caviar dera Val d’Aran ací:

http://www.visitvaldaran.com/wp-content/uploads/2018/02/llibret-setmana-del-caviar-2018.pdf