• Era aliança estrategica entre Aran Salut e eth Parc de Salut Mar, artenhuda peth Conselh Generau d’Aran ena legislatura 2007-2011, permet ath nòste sistèma sanitari e sociau facilitar er accès a servicis de nauta especializacion, compdar damb especialistes de prumèr nivèu e garantir ua nauta qualitat assistenciau as aranesi e araneses

• Aué s’an commemorat tanben es dètz ans deth servici d’oncologia en Aran, ua hita qu’a permetut tractar en nòste Espitau a pacients oncologics, en tot evitar desplaçaments contunhs enquia Barcelona e aufrir-les ua atencion personalizada, proxima e umana, damb er objectiu de melhorar era sua qualitat de vida

Aguest maitin a auut lòc er acte de commemoracion des dètz ans d’aliança estrategica entre Aran Salut e eth Parc de Salut Mar, qu’a compdat damb era preséncia e participacion dera sindica d’Aran, Maria Vergés, e des principaus responsables d’aguesta aliança e professionaus de diuèrsi airaus.

Pendent aguesta jornada s’a destacat era importància qu’a entath sistèma integrat de benèster e salut aranés poder compdar damb eth supòrt e collaboracion deth Parc de Salut Mar en diuèrsi airaus. En aguest sens, era sindica d’Aran manifestaue que “mos permet, ath delà de facilitar er accès a servicis de nauta especializacion, disposar de professionaus qualificats que balhen supòrt as nòsti professionaus, que dejà amien a tèrme un trabalh remercable” e higie que “mantier e aprigondir ena aliança damb un centre de referéncia coma ei er Hospital del Mar ei indispensable entà melhorar e consolidar eth nòste sistèma sanitari e sociau, en tot balhar ara ciutadania aranesa era atencion de besonh sense auer de desplaçar-se dehòra deth nòste territòri, en tot melhorar atau era sua qualitat de vida e assistenciau e garantir es sòns drets coma ciutadania.

10 ans d’oncologia en Aran

Ua hita fòrça destacabla d’aguesta aliança e qu’aué s’a commemorat, son es dètz ans deth servici d’oncologia en Aran. En ua taula redona sus aguest ahèr qu’a compdat damb era participacion deth Doctor Joan Albanell, cap deth Servici d’Oncologia Medicau e director deth Programa de recèrca en Càncer der Institut Hospital del Mar, e de diferents professionaus qu’an format e formen part d’aguest servici en Aran e Barcelona, atau coma pacients qu’an compartit es sòns testimònis, s’a parlat sus era importància qu’a poder compdar damb un servici d’oncologia en territòri.

“Evitar es desplaçaments enquia Barcelona ei melhorar de forma fòrça considerable era qualitat de vida non sonque des pacients oncologis, senon tanben des sues families. Pendent aguesti dètz ans, eth servici d’oncologia en Aran, format per professionaus der Espitau Val d’Aran e deth Hospital del Mar, a anat evolucionant en Aran ath madeish temps qu’ac hège en Barcelona, autant a nivèu tecnic e professionau, coma uman”, afirmaue eth Dr. Albanell.

Era equipa conformada pes professionaus d’Aran Salut e eth Hospital del Mar a artenhut aufrir as pacients oncologics deth nòste territòri un servici personalizat, proxim e uman, damb ua atencion integrada qu’a er objectiu de plaçar as persones en centre e aufrir-les eth melhor servici possible.

Ath delà deth servici d’oncologia, era aliança estrategica Aran-Mar (artenhuda peth Conselh Generau d’Aran ena legislatura 2007 a 2011) inclodís tanben fòrça autes especialitats coma farmacia, traumatologia, otorrinolaringologia, reabilitacion, etc.

Tot açò supause ua melhora dirècta dera qualitat de vida e dera qualitat assistenciau des aranesi e araneses, e mos permet redusir eth detriment que patim pr’amor d’èster aluenhadi des granes ciutats.

“Er èxit d’aguesta aliança ei frut deth compromís des professionaus d’Aran Salut e deth Parc de Salut Mar, gràcies ath sòn trabalh en equip a despièch dera distància, auem podut auançar e melhorar coma sistèma e a consolidar aguesta estructura” afirmaue era directora deth Servici Aranés de Benèster e Salut (SABS), Maria Àngels Borràs.

Peth sòn costat, eth director-gerent d’Aran Salut, Jordi Vilana, asseguraue que: “non deisham de campar entath futur e auem de cercar de quina manèra mos podem seguir reinventant. En aguest sens, calerie destacar elements coma era telemedicina, que poirie auer ua repercussion molt importanta enes persones deth territòri o era atencion integrada, qu’ei eth principau objectiu deth nòste sistèma”.