Eth Centre de Tecnificacion d’Espòrts d’Iuèrn dera Val d’Aran (CETEI) deth Conselh Generau d’Aran, daurís eth procès de seleccion entà joeni esportistes que vòlen conciliar era sua formacion academica damb un entrenament d’elèit enes disciplines d’esquí aupin, esquí de hons, freeride, freestyle, snowboard e patinatge sus gèu.

Aguest programa ei adreçat a joeni d’entre 12 e 16 ans, entà aufrir-les un itinerari especific de preparacion fisica, tecnica e mentau, damb eth supòrt d’ua equipa tecnica qualificada e damb era collaboracion des clubs esportius dera Val d’Aran, Baqueira, administracions locaus e Aran Salut.

Un itinerari d’excelléncia entà joeni talents 

Eth CETEI non sonque trabalhe entà formar esportistes de naut rendiment, senon que tanben oriente eth programa entà desvolopar valors coma eth compromís, era disciplina e era superacion personau. Eth modèl de trabalh ei basat en un supòrt academic e esportiu integrat, e permet que cada joen maximize eth sòn potenciau sense descuedar es estudis.

Airau esportiu 

• Entrenaments especifics entà milhorar eth rendiment tecnic de cada disciplina.
• Preparacion fisica e mentau entà minimizar eth risc de lesions e potenciar era capacitat competitiva.
• Seguiment e collaboracion damb es clubs esportius dera Val d’Aran entà garantir ua progression continuada.
• Sessions d’analisis de video e aplicacion de naues tecnologies tà optimizar eth desvolopament tecnic.

Airau academic 

• Escolarizacion en INS Aran, tà compatibilizar es entrenaments damb es classes obligatòries.
• Supòrt educatiu damb sessions de repàs pes tardes, entà assegurar eth bon rendiment academic.
• Coordinacion entre professors e entrenadors entà ajustar es oraris e es besonhs de cada estudiant.

Disciplines esportives e calendari 

Eth CETEI premanís un plan d’entrenament especific entara preparacion de cada joen esportista enes següentes modalitats:

• Esquí aupin
• Esquí de hons
• Freeride
• Freestyle
• Snowboard
• Patinatge sus gèu

Durada deth programa 

• Inici: Dempús deth pònt dera Immaculada
• Fin: Setmana abans de Setmana Santa

Condicions d’accès 

Entà accedir en programa, es esportistes an de complir damb determinadi critèris de seleccion:

• Apertier a un club aranés e dispausar de licéncia federativa.
• Èster matriculat en INS Aran a compdar deth 2au trimèstre.
• Passar es pròves d’accès organizades pes tecnics deth CETEI.

Mès informacion: https://forms.gle/fyF97R42HHARVaSKA

Finançament deth programa 

Eth CETEI foncione gràcies ara collaboracion entre institucions publiques e familhes.

Còst deth programa

Eth prètz per esportista càmbie segon era modalitat e es besonhs individuaus, de cada disciplina e esportista. Aguest includís:

• Entrenaments damb tecnics especializats.
• Sessions de preparacion fisica e mentau.
• Part academica
• Forfet de sason e transpòrt.
• Accès tàs installacions esportives deth Palai de Gèu.

Perqué escuélher eth CETEI? 

Participar en aguest programa supause formar part d’un projècte unic enes Pirenèus, que vò desvolopar talents esportius e, tanben, ajudar ara formacion integrau des joeni coma esportistes e coma persones.

Mès informacion e inscripcions

Se vòs qu’eth tòn/tua hilh/a forme part deth CETEI e aspire a un futur en naut rendiment esportiu mentre se forme academicament, contacta damb nosati: conselh@aran.org

Vielha, 17 de hereuèr de 2025