Vielha, 2 d’agost de 2016.- Eth Conselh Generau d’Aran a finalisat aguesta setmana es trabalhs de limpiesa deth prumèr tram deth camin de Cledes, que va des de Bossòst enquias Mines Margalida.

Eth tram de camin dubèrt a gaire ben 1 km, e permet circolar peth camin de Cledes, qu’ei un des mès impressionants de tota era Val d’Aran e completar, atau, ua rota circolara damb fòrça bones vistes dera poblacion de Bossòst.

Damb aguest son dejà dus es camins recuperats deth projècte dera rota deth Tuc deth Montlude, pr’amor qu’eth passat 15 de juriòl eth Conselh Generau d’Aran e er Ajuntament de Vilamòs inicièren es trabalhs de desbrossament e mercatge deth camin que ges de Vilamòs.

Eth Conselh Generau d’Aran, amassa damb es ajuntaments de Les, Bossòst, Canejan, Arres e Vilamòs, impulsen aguest projècte entà potenciar eth Tuc deth Montlude de 2.518 m, coma un referent de nauta montanha entàs terçons d’Irissa e Quate Lòcs, e optimisar es sòns valors naturaus. Aguest hèt hè eth projècte fòrça atractiu pr’amor qu’era rota d’accès e descens pòt èster diferenta damb finau, tostemps, en un des cinc pòbles.

D’aute biais, eth Conselh Generau d’Aran a previst iniciar aguesta madeisha setmana es trabalhs dera senhalizacion de nauta montanha dera rota deth Tuc deth  Montlude.