-
Eth dret a sufragi se pòt exercir a distància a trauès deth vòt per corrèu entàs persones que non se trapen en territòri eth dia des comicis. Eth termini ei dubèrt enquiath 18 de mai e era sollicitud se pòt tramitar de forma presenciau enes oficines de Corrèus o en linha a trauès dera sua web
Eth Bulletin Oficiau der Estat (BOE) publicaue eth passat 4 d’abriu eth Reiau Decrèt 207/2023, de 3 d’abriu, peth que se convòquen es eleccions locaus deth 28 de mai. Atau madeish, eth madeish 4 d’abriu se publicaue en Diari Oficiau dera Generalitat de Catalunya es Decrets de convocatòria des eleccions ath Conselh Generau d’Aran e ara presidéncia des entitats municipaus descentralizades, aprovades peth Conselh de Govèrn deth 28 de març.
Eth dret a sufragi se pòt exercir a distància a trauès deth vòt per corrèu entàs persones que non se trapen en territòri eth dia des comicis.
Eth termini entà sollicitar eth vòt per corrèu ei dubèrt enquiath 18 de mai e era sollicitud se pòt tramitar de forma presenciau, en tot remassar er imprimit de sollicitud enes oficines de Corrèus o se pòt presentar tanben en linha a trauès dera web de Corrèus (entad açò calerà dispausar de DNI electronic o certificat digitau valid).
En imprimit de sollicitud, auràs d’especificar era adreça postau a on vòs que s’envie era documentacion electorau. Era Oficina de Cens electorau te harà arribar en aguesta adreça:
- Ua papereta de cada ua des formacions politiques que se presenten a cada un des procèssi convocadi.
- Ua envolòpa de votacion entà cada procès electorau.
- Eth certificat d’inscripcion en cens.
- Ua envolòpa damb era informacion dera tua mesa electorau.
- Un document explicatiu.
Un còp recebuda tota era documentacion, escuelh era papereta de votacion entà cada procès tath que vages a votar e introdusís-la ena envolòpa de votacion corresponenta (o non includisques papereta se decidisses votar en blanc).
- Introdusís es envolòpes de votacion e eth certificat d’inscripcion en cens laguens dera envolòpa ena qu’ei escrita era adreça dera tua mesa electorau.
- Non introdusisques cap document acreditatiu dera tua identitat laguens dera envolòpa de votacion, perque en aguest cas eth tòn vòt serà considerat nul.
- Pòrta aguesta envolòpa tà Corrèus e envia-la enquiath 24 de mai. Er enviament ei de franc, mès rebremba qu’auràs de presentar eth DNI en vigor originau.
Eth dia des eleccions, Corrèus harà arribar totes es envolòpes que contien vots as meses electoraus. Un còp finalizada era votacion (tàs 20:00 ores) e abans de realizar er escrutini, era mesa introdusirà es envolòpes de vòt recebudes per corrèu enes urnes.
E rebremba: se vòtes per corrèu e era tua sollicitud ei acceptada, non poiràs votar de manèra presenciau ena tua mesa electorau eth dia des eleccions.
Pòs trapar mès informacion en: