• Eth Conselh Generau d’Aran aufrís aguestes ajudes entà motivar era continuitat dera carrèra esportiva des joeni e joenes estudiants d’Aran, d’entre 12 e 22 ans que corsen ensenhaments obligatòris o pòst obligatòris, e entà balhar tanben supòrt economic as famílies

Un an mès, eth govèrn d’Aran torne a daurir era sua convocatòria entara sollicitud des sues ajudes adreçades as esportistes estudiants dera Val d’Aran entath cors academic 2023/2024.

“Deth Conselh Generau d’Aran ençà volem balhar supòrt ara nòsta joenessa entà promòir eth desvolopament deth sòn talent esportiu, sigue ena modalitat que sigue. Eth principau objectiu d’aguestes bèques ei motivar era continuitat dera carrèra esportiva des nòsti joeni e joenes, ath madeish temps que seguissen damb es sòns estudis” asseguraue eth conselhèr d’Espòrts, Javier Cavero, en tot híger que: “tanben ei important entà nosati poder balhar supòrt economic as famílies d’aguesti joeni e ajudar-les a afrontar ua part dera despena que supause dedicar-se ar espòrt”.

Aguestes ajudes s’adrecen as joeni esportistes deth territòri que corsen ensenhaments obligatòris (ESO) o pòst obligatòris (titolacions de tecnics esportius, cicles formatius o estudis universitaris), entre es 12 e 22 ans e que siguen esportistes en actiu e residents en Aran.

Es bases reguladores pòden consultar-se en taulèr d’edictes deth Conselh Generau d’Aran:

https://tauler.seu.cat/pagDetall.do?idEdicte=457981&idens=8103980001