• Aguesta bèca, dirigida a joeni e joenes d’entre 12 e 22 ans, a coma objectiu motivar era contunhitat dera sua carrèra esportiva mentre estudien

• “Eth govèrn d’Aran a un gran compromís damb era joenessa deth país e aguest tipe d’ajudes son de besonh entà cultivar eth sòn talent e ajudar as familhes a assolir part des despeses que se deriven dera sua formacion”, afirme eth sindic d’Aran

Dejà ei dubèrt eth tèrme de presentacion de sollicituds tàs ajudes qu’aufrís eth Conselh Generau d’Aran as esportistes estudiants deth territòri entath cors academic 2019-2020.

Er objectiu qu’an aguestes bèques ei motivar era contunhitat dera carrèra esportiva des joeni e joenes d’entre 12 e 22 ans mentre seguissen damb es sòns estudis obligatòris (ESO) o post obligatòris (cicles formatius, estudis universitaris o titolacions de tecnic esportiu).

Es requisits que s’an de complir entà èster beneficiaris d’aguestes ajudes ei èster esportistes en actiu, èster matriculadi en quauqu’un des anteriors estudis especificats e presentar era sollicitud, coma molt tard, eth 29 de noveme de 2019.

Era ajuda qu’aufrís eth Conselh ei compatible damb quinsevolh auta que se pogue recéber pera madeisha finalitat, mès non se poderàn acuélher ad aguesta convocatòria es joeni que figuren en BOE e en DOGC coma esportistes de naut nivèu.

“Eth govèrn d’Aran a un gran compromís damb era joenessa deth país e aguest tipe d’ajudes son de besonh entà cultivar eth sòn talent e ajudar as familhes a assolir part des despeses que se deriven dera sua formacion”, afirme eth sindic d’Aran, Francés Boya.

Tota era informacion sus aguesta convocatòria se pòt trapar en taulèr d’anoncis dera plana web deth Conselh Generau d’Aran.