• Era installacion dera caudèra de biomassa der Espitau Val d’Aran forme part deth projècte de Gestion Forestau deth govèrn deth Conselh Generau damb era collaboracion des ajuntaments e EMD’s aranesi, que supause ua clara apòsta pera bioeconomia e eth suenh as bòsqui dera Val d’Aran

Dejà ei publicada era licitacion des òbres d’installacion dera caudèra de biomassa entar Espitau Val d’Aran, ua accion que forme part deth nau Mecanisme de Gestion Forestau desvolopat peth Conselh Generau d’Aran amassa damb es ajuntaments e EMD’s aranesi.

Eth projècte dera installacion caudèra de biomassa der Espitau a estat impulsat damb era collaboracion dera Deputacion de Lleida e s’enquadre laguens des accions deth projècte FOREST4LOCAL deth programa FEDER. Eth periòde de presentacion d’aufèrtes finalizarà eth pròplèu deluns, 7 de deseme entàs 12:00 ores.

“Damb era installacion dera naua caudèra der Espitau substituiram eth gasòil coma combustible pera matèria organica que trapam enes nòsti bòsqui”, explicaue era sindica d’Aran, Maria Vergés, en tot híger que “eth profitament dera biomassa mos permet produsir ua energia mès barata, renovable e damb mens emissions e, ath delà, mos ajude a mantier nets es nòsti bòsqui, çò que contribuís a previer incendis”.

En aguest sens, era síndica d’Aran a afirmat que: “era estrategia forestau ena que trabalham des deth govèrn deth Conselh Generau a coma principau objectiu amiar a tèrme un profitament sostenible des nòsti bòsqui, en tot melhorar, per ua part, era nòsta qualitat ambientau e, per ua auta, era economia deth territòri, pr’amor qu’era biomassa ei un recors abondiu en Aran que sonque mos cau saber emplegar”.

Lèu gesserà a licitacion tanben eth Centre de Logistica de Biomassa deth pòble de Les. Aguestes dues infraestructures en foncionament permeteràn generar ua economia verda ath torn des montanhes e arténher uns bòsqui mès resilients ath cambi climatic e as incendis forestaus.