• Ena tarde d’ager, es efectius de Pompièrs-Emergéncies d’Aran trabalhèren en tres servicis simultanis en recéber tres avisi d’incendis en diferents punts deth territòri

Era serada d’ager, 22 de gèr, siguec fòrça intensa entath còs de Pompièrs-Emergéncies d’Aran, qu’aueren de hèr front a tres servicis simultanis en diferents punts deth territòri.

Entàs 19:02 ores se produsic un huec en un un pis plaçat en un edifici de tres viuendes en Arties. Es dues prumères se vederen afectades per aigua e ena tresau se cremèc eth tet. Aguesta actuacion compdèc damb era participacion de vint-e-tres pompièrs in situ e tres mès en parc entà cobrir, e s’alonguèc enquiàs 23:09 ores.

Pòc dempús, tàs 19:25, arribaue er avís d’un incendi ena cabina d’un camion de matèries perilhoses en kilomètre 143,5 (Senet) dera N-230. En arribar, es 6 efectius que participauen en aguesta actuacion verifiquèren que non i auie cap huec e tornèren ath parc, finalizant eth servici tàs 20:45.

En darrèr lòc, tàs 20:45 ores se produsic un aute incendi ena humenèja d’ua viuenda de Betren. Es cinc efectius que participèren en aguest servici amortèren e sanejèren era humenèja, en tot acabar era actuacion tàs 23:05.