Eth Conselh Generau d’Aran a acuelhut era dusau jornada de trabalh entara coordinacion dera nauau etapa deth Tour de França 2016, que començarà en Vielha e finalizarà en Arcalis (Andòrra), eth pròplèu 10 de junhsèga de 2016
Ager dimèrcles, auec lòc era dusau jornada de trabalh entre era organizacion deth Tour de França e es responsables deth Conselh Generau d’Aran. Era reünion compdèc damb era preséncia de Yannick Goasduff, Commissaire Général Responsable des Départs, acompanhat de Bertrand Charrier, Directeur de cyclisme Commissaire Général per part deth Comitat Organizador deth Tour de França e, de José A. Boya, conselhèr de Territori deth C.G.A., Pau Perdices, Cap de Gabinet deth sindic d’Aran, Anna Díaz, conselhèra de Torisme e Desvolopament Economic d’Aran, José Enrique Arró, conselhèr d’Agricultura, Ramaderia e Medi Naturau deth C.G.A,., Mª Angels Borràs, directora deth SABS, Jordi Benet, cap deth servici territoriau de carretères de Lhèida dera Generalitat de Catalonha, de representants deth Ministèri de Foment en Catalonha e de diferents comandaments de Mossos d’Esquadra.
Era reünion servic tà informar as assistents quin serà eth recorregut des 184.5 Km dera nauau etapa deth Tour de França 2016, damb 5 pòrts de montanha e un traçat inedit enquia ara ena istòria dera carrèra, atau coma des diferentes accions de coordinacion entre es còssi e fòrces de seguretat (Garde Républicaine de la Gendarmerie Française, Mossos d’Esquadra, Policia Nacionau e Guardia Civil), implicadi en eth desvolopament dera etapa ath sòn pas pes carretères catalanes (C-28, C -13, N-260, N-145).
TALHS DE TRAFIC
Ei previst qu’eth dimenge 10 de junhsèga, entà es 9 deth maitin comencen es prumèrs talhs de circulacion entà perméter eth pas dera caravana publicitària deth Tour de França qu’ei dirigida pera Garde Républicaine de la Gendarmerie Française, començarà eth sòn recorregut as 10 ores, dues ores abans der orari previst entad inici dera etapa que serà ath torn des 12 deth meddia.
Bertrand Charrier, informèc que pendent eth mes de seteme se procedic a inspeccionar es carretères que rodaràn pera etapa que n’a destacat eth sòn perfècte estat, çò que hè que non calgue produsir accions en hilat viari, sonque sajar d’enfortir era seguretat deth traçat ath sòn pas pera Seu d’Urgell.
Er operatiu deth Tour de França 2016, compdarà damb 9 elicoptèrs e 2 avions. Es servicis medics e d’assisténcia sanitària coordinada peth Cap medic dera carrèra, compdaràn damb 7 ambulàncies e 10 mètges, ath delà de dus coches e ua motocicleta medicalitzada en transcors dera etapa.
Es reünions de coordinacion entre era organizacion deth Tour de França e eth Conselh Generau d’Aran, contunharàn pendent es mesi de gèr, març e abriu der an que ven.
