50 des 97 aportacions hètes per ciutadans e professionaus seràn incorporades ath Plan Estrategic

Eth Plan Estrategic deth SABS compdarà damb era creacion d’un Conselh Participatiu Comunitari

Vielha, 30 d’octobre de 2018.- Era residéncia geriatrica Sant Antoni de Vielha a acuelhut era dusau jornada deth procès participatiu encetat eth passat 9 d’octobre entà elaborar eth Plan Estrategic deth Servici Aranés de Benestar e Salut 2018-2023.

Ena prumèra jornada deth procès participatiu i collaborèren un totau de 33 persones, 17 professionaus der Encastre Sanitari, e 16 representants dera ciutadania, repartidi en 8 grops de trabalh. Es participaires heren un totau de 97 aportacions en procès participatiu, laguens de tres encastres: iniciatiues sus eth modèl; iniciatiues assistenciaus; e iniciatiues sus es recorsi.

Deth totau de 97 aportacions realizades pes grops de trabalh, 55 corresponen as professionaus dera sanitat e 41 as representants dera ciutadania. En totau i a agut 38 aportacions concernent iniciatiues sus eth modèl, 25 sus iniciatiues assistenciaus, e 34 sus recorsi e competéncies.

Dera totau d’aportacions deth procès participatiu, 50 d’aguestes seràn incorporades ath Plan Estrategic deth SABS 2018-2023.

Mª Àngels Borràs, directora deth Servici Aranés de Benestar e Salut, a explicat qu’eth Plan Estrategic a d’arrecuélher era planificacion a trauès de diferentes linhes estrategiques, e qu’ahèrs sus recorsi umans o economics, non les cau hèr part deth Plan Estrategic, donques se canalizen a trauès de projèctes especifics dedicadi ath besonh d’implementar naui servicis. Ei per açò, a dit, que des d’ua revision detalhada des aportacions de professionaus e ciutadans, bères ues des prepauses hètes ena prumèra jornada deth procès participatiu non s’incorpòren ath Plan Estrategic 2018-2023.

Fin finau, Borràs a anonciat qu’ua des aportacions que s’incorpòren ath Plan Estrategic ei era creacion d’un Conselh Participatiu Comunitari integrat per representants d’associacions e entitats, ciutadans a títol particular e professionaus der Encastre Sanitari.

Eth Plan contemple es linhes estrategiques e projèctes singulars per un periòde de 5 ans, entre eth 2018 e eth 2023: Desvolopar estrategies entà implementar eth modèl d’atencion centrada enes persones; era atencion sanitària accessibla, resolutiva e integrau; implementar un modèl d’atencion integrau e centrada enes persones damb malauties croniques e damb besonhs complèxi; era creacion d’un nau modèl d’atencion primària e salut comunitària en Aran; era aplicacion dera salut digitau enes estructures assistenciaus; er abordatge dera violéncia maschista, infantila e ara gent grana; implementar era reabilitacion domiciliaria e incrementar eth supòrt ath pacient oncologic, entre d’auti.