• Actuaument, er accès en campanau dera glèisa de Sant Andreu se trape en molt mau estat, arribant a èster perilhós, e damb aguestes òbres d’accessibilitat non sonque se garantirà era seguretat des persones, en tot perméter qu’eth campanau sigue visitable, senon que tanben se meterà en valor era estructura de husta deth sòn interior, d’un naut interès arquitectonic e istoric

Eth govèrn deth Conselh Generau d’Aran a aprovat er expedient de contractacion e licitacion des òbres d’accessibilitat ath campanau dera glèisa de Sant Andreu de Salardú.

Er objectiu d’aguesti trabalhs ei dotar ath campanau d’ues condicions d’accès segures, pr’amor qu’ena actualitat se trape en molt mau estat, arribant a èster perilhós. Es actuacions que s’amiaràn a tèrme cerquen respectar era estructura d’òbra e, sustot, méter en valor es estructures de husta d’aguest campanau, que son d’un naut interès arquitectonic.

“Eth govèrn deth Conselh Generau d’Aran ei totaument comprometut damb era proteccion deth nòste auviatge e, mejançant actuacions coma aguesta, cerque méter en valor es nòstes glèises e monuments, que son ua part importanta dera nòsta cultura e es nòstes tradicions”, afirmaue era sindica d’Aran, Maria Vergés, en tot híger que: “damb es òbres d’accessibilitat en campanau dera glèisa de Sant Andreu, ath delà de reforçar era estructura e hèr-la segura, se permeterà hèr visitable eth campanau e dar a conéisher eth sòn valor istoric”.

Aguestes òbres, dotades d’un pressupòst de lèu 175.000 euròs, plantegen eth bastiment d’ua naua escala d’accés que garantisque era seguretat des usatgèrs e usatgères enquiath quatau nivèu, qu’ei a on se trapen era sala de campanes damb eth relòtge de campanau e era impressionanta estructura de casse deth castèth de campanes. Tanben se restauraràn es tres estructures radiaus deth nivèu 4 e s’assolidarà un tram d’escala (barrada ath public) qu’arribarà enquiath cincau nivèu, entà perméter eth corrècte mantenement des campanes.