• Aguest convèni de collaboracion entre andues institucions promoirà projèctes innovadors damb ues dinamiques de creishement economic que permeten crear oportunitats de desvolopament rurau

Eth Conselh Generau d’Aran e PallarsActiu an signat un convèni de collaboracion entà impulsar accions que permeten gestionar mès eficaçment eth mon rurau, garantir era connectivitat entre andus territòris e crear ua estrategia de futur que garantisque eth nivèu de vida des persones que i residissen, en tot desplegar uns servicis de qualitat.

“Aguest convèni de collaboracion entre eth Conselh Generau e PallarsActiu, promoirà era innovacion en espaci rurau damb ues dinamiques de creishement economic que crearàn oportunitats de desvolopament locau”, afirmaue era sindica d’Aran, Maria Vergés.

“Eth passat mes d’octobre mos amassèrem telematicament entà presentar-les eth HUB d’innovacion en zònes de montanha, projècte en quau PallarsActiu collaborarà entà regenerar amassa eth teishit sociau e empresariau d’ua naua economia rurau adaptada ath sègle XXI”, higie eth conselhèr de Naues Tecnologies e Innovacion, Francés Boya.

Pera sua part, es representants de PallarsActiu presentèren tanben eth sòn projècte de profitament dera caça cinegetica, que permeterà gestionar e comercializar es productes carnics derivadi dera activitat dera caça d’ua forma controlada, en tot trèir profitament d’un producte de qualitat e de proximitat.

Andues institucions an mostrat auer un interès comun entà collaborar e crear ua estrategia de futur qu’impulse ara Val d’Aran e es Pallars Sobirà e Jussà entà apostar pes tecnologies e era innovacion mès tanben pera promocion des productes de proximitat e es servicis as persones.