Era Fondacion Endesa destinarà 400.000 èuros ara Val d’Aran entara reconstruccion des principaus infrastructures maumetudes pes inondacions de junh d’est an passat.

Eth president dera fondacion, Rafael Miranda e eth sindic d’Aran, Carlos Barrera, signèren ager deluns eth convèni de collaboracion que regule era aportacion e qu’a ua vigéncia d’un an.

Era Fondacion coopera en iniciatiues de caractèr sociau en es territòris a on desvolòpe era sua activitat industriau en tot promòir era adeqüacion païsatgistica d’espacis naturaus protegidi.

Endesa ei implantat ena conca der arriu Garona e a mantengut ena sua dilatada preséncia ua politica activa e de supòrt economic en projèctes d’encastre culturau, economic e sociau.

Pendent es inondacions, Endesa activèc eth sòn plan operatiu d’emergéncies e destinèc dus elicoptèrs entà desplaçar a manòbres e materiau electric enquias punts deth territòri a on es vies d’accès èren incomunicades.

Alavetz installèc dotze grops electrògens entà garantir eth subministrament e a trauès dera armada demanèc ara Unitat Militara d’Emergéncies qu’elicoptèrs de grana capacitat de carga –un Cougar e un Chinook– transportèssen es grops electrògens mès pesadi a punts a on non se podie accedir d’ua auta manèra.

Atau, arribèc a mobilizar un centenat de tecnics e manòbres en es trabalhs de reposicion deth subministrament e apariament o reconstruccion d’infrastructures electriques.