• Er objectiu de realizar aguestes enquestes tanben de forma presenciau ei arténher era participacion deth major nombre de joeni d’entre 16 e 35 ans e de hemnes majors de 16 enquiara vielhessa

• Per miei d’aguest procés de participacion ciutadana, eth govèrn deth Conselh Generau d’Aran vò conéisher es besonhs reaus des collectius as que se dirigís era enquesta e establir es accions a préner enes pròplèu ans en encastres coma era salut, eth léser, eth trabalh, era igualtat o er abitatge, entre d’auti

Eth passat mes de junh, eth Conselh Generau d’Aran lancèc ua enquesta, realizada a trauès dera consultoria Xarxa Consultors, dirigida ara joenessa d’entre 16 e 35 ans e as hemnes majors de 16 ans que viuen, trabalhen o an neishut ena Val d’Aran.

Entà impulsar era participacion ciutadana, aguesti dies es especialistes de Xarxa Consultors realizen enquestes presenciaus enes espacis mès transitadi des pòbles dera Val d’Aran. An amiat a tèrme enquestes tanben entre es hemnes dera Residéncia Sant Antòni e es Casaus deth Jubilat entà conéisher era sua situacion e percepcion dera realitat aranesa.

“Er objectiu d’aguesta enquesta ei conéisher era situacion reau d’aguesti dus collectius en nòsti territòri entà poder establir es accions a préner enes pròplèu ans en encastres coma era salut, er abitatge, eth trabalh, eth léser, era igualtat o er espòrt, entre d’auti” explicaue era sindica d’Aran, Maria Vergés, en tot híger que: “entath govèrn deth Conselh Generau d’Aran ei imprescindible compdar damb era participacion dera ciutadania entà arténher un país damb mès probabilitats, mès divers e mès igualitari en futur”. Per aguest motiu, era sindica demanaue “era maxima participacion possible en aguesta enquesta, entà auer atau ua imatge mès reau dera sua situacion”.

Se tu tanben as entre 16 e 35 ans, o es ua hemna de mès de 16 ans, pòs participar a trauès d’aguest ligam:

https://xarxaconsultors.typeform.com/to/aD1wX58S