- Aguestes ajudes economiques, gestionades per Red.es e finançades pes hons NextGenerationEU, son destinades a subvencionar era digitalizacion des negòcis entà modernizar eth teishut productiu e afavorir eth sòn creishement en mercat.
Eth tèrme de sollicituds deth programa Kit Digitau s’acabe eth 31 de deseme de 2024 tàs 11 ores entàs PYMES d’entre 3 e 50 trabalhadors. Entàs autonòms/es, eth tèrme de sollicituds s’alongue enquiath 31 d’octobre de 2025.
Aguestes ajudes an permetut implementar mès de 350.000 projèctes de digitalizacion en petites empreses e autònoms/es, a trauès dera creacion de pagines web o hilats sociaus entara installacion de programes de facturacion, de gestion de clients o de ciberseguretat. Era quantitat dera subvencion s’ajuste ara mesura deth negòci enquia un maxim de 12.000 euros.
Es empreses e autonòms qu’encara non agen sollicitat eth lòt digitau pòden accedir ath programa en tres passi:
- Registrar-se ena plataformaAcelera pyme e hèr eth tèst de diagnostic digitau tà verificar eth nivèu de digitalizacion a trauès de 13 qüestions simples.
- Consultar es solucions de digitalizacion disponibles que milhor s’adapten as besonhs deth sòn negòci e consultar eth catalòg d’agents digitalizadors; en Aran i a 3 empreses qu’aufrissen aguesti servicis:
- Maladeta Studio
- Vielha Computers
- Arantec
- Aguesti agents s’encuedaràn d’implementar aguestes milhores tecnologiques enes enterpreses qu’ac solliciten.
- Presentar era sollicitud dera ajuda ena sedença electronica de Red.es (sede.red.gob.es), a trauès d’aguest ligam seleccionar era convocatòria e entrar en apartat “Accès ara formalitat” autenticant-se o damb eth pin Cl@ve o certificat electronic, e enviar era sollicitud.
I a 12 categories de solucions digitalizadores associades a un impòrt: pagina web, preséncia e posicionament en Internet, comèrç electronic (E-commerce), Marketplac, tà optimizar es canaus de distribucion, gestion de hilats sociaus, gestion de procèssi tà digitalizar aspèctes operatius o productius deth negòci, facturacion electronica, servicis e airines d’oficina virtuau, Business Intelligence e analitica tà trèir profit des dades dera tua empresa, comunicacions segures e ciberseguretat tà protegir era seguretat des tues connexions e informacion.
Un amàs de possibilitats digitalizadores que pòden transformar es negòcis locaus entà èster mès competitius e aufrir as comèrci des territòris de montanha era possibilitat de daurir-se a naui mercats e arribar a mès public.
Ath delà, enes darrèri ans, era ciberseguretat des PYMES e autonòms/es ei ua oportunitat que non dèishe de créisher pr’amor que tot soent se pense qu’es hackers sonque actuen contra granes corporacions, maugrat qu’es dades indiquen qu’eth 43% des ciberatacs s’adrecen a micropymes, pr’amor dera sua menor preparacion en ciberseguretat. Aguesta ajuda ei ua bona oportunitat entà implementar mesures de proteccion de dades enes petites empreses.
En HèPic, coma centre d’innovacion deth Conselh Generau d’Aran, volem impulsar qu’es enterpreses araneses se poguen beneficiar d’aguestes subvencions entà que se poguen transformar digitaument enes sectors que mès ac agen de besonh.
Vielha, 5 de deseme 2024