Es vesins e es clients des lotjaments legaus dispausaràn d’un permís especiau

Ena Val d’Aran a entrat en vigor era ordenança que regule era arremassada de misharnons en toti es sòns bòsqui. Atau, es guardes forestaus informaràn ara gent qu’era ordenança a entrat en vigor tot e que no i aurà multes enquiath mes de mai, quan eth Conselh Generau d’Aran installe era senhalizacion enes pistes forestaus entà informar sus era proïbicion d’arremassar misharnons.

Aquesta mesura non a un objectiu recaptatòri pr’amor qu’ei totauments gratuïta e òc que preten eliminar es grops de gent de dehòra dera Val d’Aran que se dediquen unicaments a arremassar misharnons entà vener-les. Aguesta regulación vò garantir qu’es aranesi quan gesquen entath bòsc poguen trapar mishranons e, ath viatge, potenciar era Val d’Aran coma destinacion toristica.

Serà eth Conselh qui liurarà eth carnet as residents e as proprietaris de 2au residéncia e es establiments l’ac daràn as clients lotjadi. En cas qu’un establiment regale carnets a persones que non age lotjades se li poderà retirar eth talonari.

Era ordenança entara arremassada de misharnons argumente qu’a compdar de hèr uns ans aguesta actiuetat a artenhut en diuèrsi airaus des tèrmes municipaus aranesi uns nivèus plan anauts de pression. Era facilitat entar accès damb veïcul a fòrça zònes antigaments restringides a desplaçaments a pè, junh damb ua actiuetat d’arremassada que non tostemp s’a amiat a tèrme en tot tier compde, a provocat ua fòrta pression sus eth medi naturau. Eth resultat, en cas de mantier-se aguesta situacion, pòt arribar a un deteriorament sensible des mieis més propicis entara vida des misharnons e, en darrèra instància, ara desaparicion de fòrça des espécies, siguen objècte d’arremassada o non.

Per aguest motiu, eth Conselh Generau d’Aran, a considerat de besonh regular era arremassada de misharnons entà poder conciliar era part consuetudinària, era part ludica e era part economica d’aguesta actiuetat damb era proteccion e eth futur des bòsqui, pr’amor qu’aguesta actiuetat pòt supausar ua hònt d’ingressi e tanben pòt crear conflictes d’interèssi damb d’autes actiuetats coma era cinegetica o era ramadèra, o pòt supausar eth deteriorament des condicions deth bòsc.