Vielha, 7 de deseme de 2017.- Eth plen deth Conselh Generau d’Aran deth passat 27 de noveme declarèc er ancian horn de pan deth pòble d’Es Bòrdes coma Ben Culturau d’Interès Locau dera Val d’Aran.

Se tracte d’ua bastissa unica pera sua volumetria e pes formes e tecnicianes de bastir tradicionaus e fòrça singulares dera Val d’Aran. Maugrat es condicions de runa actuaus, se tracte de preservar aguesti valors.

Ena Val d’Aran, coma tanben en d’autes zònes ruraus e de montanha, era elaboración domestica deth pan se mantenguec enquia dates fòrça recentes, mès ena Val d’Aran tanben i auie ua clara predominança des horns privadi, fòrça des quau n’an suberviscut enquias nòsti dies, enes façades de nombroses cases, coma un còs important, generauments semicircular e ena planta baisha, en tot constituïr un element plan caracteristic dera arquitectura tradicionau aranesa.

Eth horn de pan d’Es Bòrdes siguec bastit ath torn des ans 20 deth s.XX per Hipolito Socasau, vesin deth pòble. Eth negòci demorèc laguens des membres dera madeisha familha enquias ans 60.

En tot tier en compde eth mau estat de conservacion actuau dera bastissa, seràn es responsables e tecnicians d’auviatge deth Consellh Generau d’Aran es que decidiràn de quina manèra s’a d’actuar entara possible reabilitacion der ancian horn de pan en tot seguir çò que dispòse era Lei d’auviatge culturau sus era preservacion e mantenença de bens catalogadi.