• Abel, qu’era setmana passada guanhèc eth FJT 3* de Fieberbrunn, s’assolide coma ua des joenes promeses deth freeride mondiau.

Ager, 22 de març, eth rider aranés de 17 ans, Abel Moga Carracedo, realizèc ua linha espectaculara que li valec entà pujar en un meritòri tresau lòc deth pòdium ena Freeride Junior World Championship qu’auec lòc en Kappl (Àustria).

Abel gessec damb eth dorsau 18 des 31 esquiadors que participauen enes mondiaus junior que se disputèren en sector de Quellspitze dera estacion austriaca. Eth joen freerider aranés esquièc ua espectaculara baishada qu’includic tres boni sauts, dus d’eri enlaçats en ua zòna fòrça expausada -en tot èster eth darrèr un doble-, obtenguec ua puntuacion de 78,67, a sonque un punt deth dusau lòc.

Era linha siguec sense dobte ua des melhores deth dia en totes es categories e sonque era manca de fluïdesa li privèc d’un melhor resultat. Eth soís, Dylan Lavenex, siguec campion en Kappl seguit deth canadian, Ben Woodward, qu’ath costat d’Abel Moga completèren eth pòdium ena categoria masculina. Eth barcelonés/finlandés, Axel J. Tukianen, que daurie era pròva damb eth dorsau 1, acabèc ena 20au posicion dempús de non poder completar era linha qu’auie planejada.

Abel Moga e Axel J. Tukianen, son en Centre de Tecnificacion en Freeride deth Conselh Generau d’Aran e membre deth club Emotion.

Vielha, 23 de març de 2018

Conselh Generau d’Aran: Núria Sanjuan