Vielha, 30 de gèr de 2019.- Aué s’a celebrat en Folgaria (Itàlia) ua naua pròva de Slalom dera Copa Itàlia FIS, a on er aranés Álex Puente, dera equipa d’esquí aupin dera RFEDI, a artenhut proclamar-se guanhador, per deuant der italian Pietro Franceschetti (+0,32) e eth rus Simon Efimov (+0.50) çò que li permet obtier 14,43 punts FIS, damb çò qu’iguale era tresau melhora mèrca personau dera sua carrèra esportiua.

Cau destacar qu’aguesta victòria precedís ara artenhuda eth passat 13 de deseme, ena pròva de gigant FIS celebrada en Davos (Soïssa) e dempús d’èster 3 setmanes sense poder entrenar, a causa dera lesion de cavilha sofrida pendent eth GS FIS de Gressoney (Itàlia).

Damb aguesta dusau victòria dera sason, ja son ueit es victòries der esquiaire aranés en pròves FIS.

Tanben an participat Aingeru Garay e Albert Ortega, en tot finalizar en nauau e catorzau posicion, respectivaments.

Álex Puente se desplaçarà en Soïssa entà entrenar Slalom Parallel damb es sòns companhs Juan del Campo e Kim Salarich, a on prepararàn era pròva de Copa d’Euròpa, que se disputarà aguest diuendres, 1 de hereuèr, en Tignes (França). Ena copa d’Euròpa Alex ei er esquiaire espanhòu melhor classificat, actuauments ena 33au posicion.

Info: RFEDI