Er aranés, Álex Puente.

Es esportistes deth Club Aranés d’Espòrts d’Iuèrn (CAEI), Júlia Bargalló, e er aranés, Álex Puente, an estat seleccionadi, ath costat de catorze esportistes mès, entà participar enes XXVII Jòcs Mondiaus Universitaris d’Iuèrn (Universiada d’Iuèrn) que se celebraràn eth pròplèu mes de hereuèr ara estacion andalosa de Sierra Nevada.

Aguesta ei ua competicion organizada pera FISU (Federacion Internacionau d’Espòrt Universitari) e se tracte d’un gran eveniment esportiu qu’a lèu 100 ans d’istòria e amasse a atletes de mès de 50 païsi.

Júlia (1995) e Álex (1994) se formèren enes categories infantiles en club aranés, entà passar dempús a formar part deth CTVA (Centre de Tecnificacion dera Val d’Aran).

Actuauments, toti dus apartien ara equipa dera RFEDI, encara qu’Álex seguís entrenant damb er equip de soïssa, STEFFEN-S1.

Cau destacar er esfòrç que hèn aguesti esportistes entà compaginar es sòns estudis universitaris damb es entrenaments enes sues diferentes disciplines, e er hèt qu’aguesta edicion se celèbre en Espanha ei un doble allicient.

Álex Puente ,signèc un convèni de patrocini damb eth Conselh Generau d’Aran entà promòir era destinacion toristica esportiua Val d’Aran peth mon, representada ena imatge e en es valors der esportista, e der equip deth que forme part, mejançant eth patrocini institucionau de Foment Torisme Val d’Aran.