Er aranés Álex Puente Tasias artenh era 32 posicion ena finau deth Slalom d’esquí aupin des JJOO de Sochi

• Álex Puente a finalizat 32 er un Slalom fòrça complicat

• Er austriac Mario Matt, s’a hèt damb er aur

• Pol Carreras non a pogut completar era baishada dera prumèra manja

Er aranés Álex Puente a concludit era finau deth Slalom d’esquí aupin des Jòcs Olimpics d’Iuèrn de Sochi (Russia) ena posicion 32, en un slalom fòrça complicat a on fòrça des favorits, coma Andre Myhrer o Jean-Baptiste Grange, non an pogut completar era baishada. Er austriac de 34 ans, Mario Matt, dempús d’imposar-se ath sòn compatriòta Marcel Hirscher, a artenhut er aur.

Puente, dempús de classificar-se entara finau ena 48 posicion ena prumèra manja, a finalizat eth slalom damb un temps de 1:59.45. Eth catalan, Pol Carreras non a completat era prumèra manja en eth sòn debut olimpic e non a pogut disputar era finau ath costat der aranés.

CLASSAMENT

1. Mario Matt (AUT) 1:41.84.

2. Marcel Hirscher (AUT) 1:42.12.

3. Henrik Kristoffersen (NOR) 1:42.67

…//…

32. ÁLEX PUENTE (ESP) 1:59.45.

Er aranés de 19 ans, Álex Puente, que ja debutèc en ua pròva olimpica en Sochi dimars passat (Gigant), se formèc en CAEI (Club Aranés d’Espòrts d’Iuèrn), mès dempús de hè diuèrsi ans residís en Soïssa a on entrene entà hèr concurréncia a nivèu internacionau. Ath delà, Puente compde damb eth supòrt des institucions publiques dera Val d’Aran. Eth Conselh Generau d’Aran aufrís ua subvencion as esportistes professionaus deth territòri, a on se tròbe Puente, entà poder hèr concurréncia dehòra d’Espanha. A compdar d’aguest convèni de collaboracion, Es esportistes pòrten logos dera Val d’Aran ena sua ròba de competicion.

«Aué ei un gran dia entad espòrt aranés. Álex Puente a artenhut plaçar-se entre es melhors der esquí aupin en uns JJOO. Sense dobte, aguest debut en ues olimpíades, servirà entà qu’eth sòn trabalh e esfòrç li contunhen aportant toti es èxits que se merite. Mos sentim capinauti d’eth, e demoram aué’c lèu ena Val d’Aran, era sua val, entà dar-li era arrecebuda que se merite, pr’amor que per motius de competicions, non podérem dar-li comiat coma era escadença meritaue” a manifestat eth sindic d’Aran, Carlos Barrera, qu’ath delà a ahijut “des deth govèrn d’Aran contunharam dant tot eth nòste supòrt as esportistes aranesi”.