Er aranés, Aymar Navarro Combalié, en campionat deth mon deth “Freeride World Tour”

gèr 21, 2016 Notícies
  • Deman diuendres, 22 de gèr, Vallnord-Arcalís daurirà eth Freeride World Tour, a on Aymar serà er unic representant espanhòu.
  • Est an passat en aguesta madeisha competicion, Aymar Navarro, artenhec eth Top 10.

aymar-FWT

 

Aguest diuendres, dia 22 de gèr, se celebrarà era prumèra competicion deth “Freeride World Tour” (FWT) (campionat deth mon de freeride) en Vallnord-Arcalís, a on er unic representant espanhòu serà er aranés, Aymar Navarro Combalié. Eth FWT ei eth circuit de freeride ski e surf de nhèu mès important a nivèu mondiau e se desvoloparà en scenaris dehòra de pista, de dificultat extrèma.

Est an passat Aymar tanben siguec er unic espanhòu en aguesta competicion e artenhec eth Top10.

 

AYMAR-FWT3

Aymar Navarro a manifestat “me tròbi fisicaments ben e recuperat dera lesion qu’auí en jolh est an passat e damb fòrça ganes e motivacion. Aguestes darrères setmanes m’è trapat fòrça comòde esquiant atau que demori poder hèr un bon papèr e gaudir dera experiéncia”.

 

AYMAR-FWT1

Eth vicesindic d’Aran e conselhèr d’Espòrts, Luís Carlos Medina, a soslinhat “tornar a veir ath nòste esportista Aymar ena competicion de naut nivèu dempús dera lesion d’est an passat ei ua grana notícia. Ei un orgulh entath nòste país que pogue representar-mos internacionauments. Era Val d’Aran ei damb tu. Demoram qu’artenhes fòrça boni resultats”.

Es autes etapes deth Freeride World Tour, dempús d’era que se disputarà aguesta dimenjada en Vallnord-Arcalís e abans deth barrament en Verbier, son es de Chamonix-Mont Blanc (França), en hereuèr; e es de Fieberbrunn (Àustria) e Haines (Alaska, Estats Units).

 

AYMAR-FWT2

Aymar Navarro, signèc un convèni damb eth Conselh Generau d’Aran entà promòir era destinacion toristica esportiua Val d’Aran peth mon, representada ena imatge e enes valors deth freerider. “Qui melhor qu’es nòsti joeni esportistes professionaus aranesi entà representar eth nòste país e eth sentiment d’identitat” manifestèc Carlos Barrera, sindic d’Aran.

 

AYMAR NAVARRO 1

PROGRAMA FWT:

DIJAUS 21 DE GÈR:

ORDINO
• 09:00 – 19:00: Acreditacions (Auditòri Nacionau d’Andòrra)
VALLNORD – ORDINO ARCALÍS
• 09:00 – 15:30: Workshop sus Seguretat (estacion)
• 11:30 – 15:30: Inspeccion dera zòna de competicion + reünion de riders (estacion)

DIUENDRES 22 DE GÈR:

VALLNORD – ORDINO ARCALÍS
• 09:00 – 14:00: Competicion d’elèit FWT
• 09:00 – 17:00: FWT Event Village (Planells 2.020 m), Expo fotografica, Photo wall, DJ set, après-ski
• 15:00 – 15:30: Projeccion d’Audi Road trip (Planells 2.020 m)
• 15:30 – 16:00: Ceremònia de liurament de prèmis FWT (EV – Planells 2.020 m)
ORDINO
• 18:30 – 19:00: Session de signatures des riders de FWT (Plaça Major)
• 19:00–19:30: Presentacion Oficiau FWT (Plaça Major)

 

Vielha, 21 de gèr de 2016

 

Conselh Generau d’Aran: Núria Sanjuan 

Comments are closed.