• Ua delegacion dera Corporació Catalana de Mitjans Audiovisuals, ara 3.cat, entestada pera sua presidenta, Rosa Romà, a estat aué en Aran a on s’a amassat damb era sindica d’Aran e eth vicesindic tresau en tot convier en besonh e volontat de consolidar era collaboracion entre andues institucions tar impuls der aranés, a trauès des mejans publics de 3Cat.

• Pendent era visita, s’a inaugurat era naua sedença de 3Cat ena Val d’Aran, qu’amasse es dues delegacions de ràdio e television dera corporacion catalana, era presidenta de 3Cat a anonciat es naui espacis audiovisuaus sus er aranés que son dejà presents en aguest miei.

Era sindica d’Aran, Maria Vergés, acompanhada peth vicesindic tresau deth Conselh Generau d’Aran, Javier Cavero, a recebut aguest maitin a ua delegacion dera Corporació Catalana de Mitjans Audiovisuals-3CAT ena sedença deth govèrn aranés. Era trobada a servit entà assolidar ligams e era collaboracion entre andues institucions qu’ajuden a definir eth trabalh entà qu’era lengua age un major impacte territoriau a trauès des mieis de comunicacion publica de Catalunya.

Entara sindica Vergés: “era collaboracion entre corporacion, ara 3Cat, e eth Conselh Generau d’Aran, ei indispensabla entà establir ligams e espacis de trabalh tar impuls e preservacion der aranés que permeten qu’es productes audiovisuaus que se genèren en aranés agen eth major impacte possible ena societat”. E higie: “volem trobar sinèrgies conjuntes entà impulsar era produccion audiovisuau en aranés”.

Entara presidenta, Rosa Romà: “Era naua delegacion de 3Cat a de servir, a compdar d’ara, coma plataforma de lançament de naui projèctes, a on eth papèr dera infància e era joenessa representen ua part importanta deth contengut en aranés”. E higie: “Tanben s’a de trabalhar en augment de contengut generalista que conècte damb es interèssi dera ciutadanetat deth territòri, a on er entorn digitau age un papèr important”.

Es naui productes presentadi son tad  public infantil e juvenil de contengut audiovisuau a trauès de SX3, damb programes com l’Info K, que eth 19 de deseme harà una edicion especiau dedicada ara Val d’Aran sonque en aranés, e damb contenguts com “Una mà de contes”, “Lua i el món”, “Les Tres Bessones” e “Lara i Kali”.

Tanben 54 vidèus educatius de geografía e matematiques en aranés en SuperCampus, un esturment d’aprenedissatge damb contenguts educatius de qualitat a docents, familhes e alumnes.

Entàs joeni/es, contenguts audio-visuaus centradi en entorn digitau, eth Vertical EVA damb preséncia en Instagram o Tik Tok o era apòsta per aranés damb era creacion de naui contenguts damb era influenciadora, Núria Juncà.

En encastre digitau, 3Cat aurà un perfil pròpri enes hilats sociaus, damb contengut especific en aranés: @3CatAran.

Vielha, 27 de noveme 2024