Dempús de 3 Fases ath long de tota era sason a on es melhors esquiaires d’Espanha s’an vist es cares en diuèrses pròves des diferentes modalitats d’esquí aupin, eth corredor aranés deth CAEI e que forme part deth programa de Pre Tecnificacion deth Conselh Generau d’Aran, Lluc de Castellarnau, s’a proclamat campion dera Copa Espanha ena categoria U14.

Aguest prèmi s’autrege ath corredor qu’artenh era maximala puntuacion dempús dera soma de totes es pròves disputades. Un totau de 9 pròves a on eth corredor deth CAEI a demostrat eth sòn gran moment de forma, pr’amor que se metec eth dorsau dejà ena prumèra pròva e ac a mantengut en sòn poder enquiath darrèr dia. Destacar tanben qu’er aranés a pujat ath pòdium eth totes es modalitats, des des pròves mès rapides e de velocitat (SG) enquias pròves mès tecniques (SL) en tot passar pes pròves de Gigant.

Soslinhar tanben era actuacion deth sòn companh d’equipa e tanben aranés Marc Ubeira, qu’en tot èster des petiti dera categoria, artenhec era classificacion entad aguesta Copa Espanha. Marc a demostrat eth sòn potenciau pendent tota era competicion en tot èster tostemp entre es 3 prumèrs classificadi deth sòn an e en tot agarrar experiéncia entad an que ven lutar pes prumères posicions.

Fin finau, ena categoria d’U16, María Ruiz, corredora tanben deth CAEI a realizat ua fòrça bona sason en tot estar tostemp en Top 10 dera categoria e en tot arténher bèth pòdium en bèra ua des pròves disputades.

Vielha, 5 d’abriu de 2019

Conselh Generau d’Aran: Núria Sanjuan

Informacion e fotos: CAEI