Mès de 4.000 persones gaudiren dera exibicion sus gèu “Eth viatge dera aigua” que realizèren es joeni Tón Cónsul e Irene Manau

Era cultura e eth gèu anèren dera man pendent era ceremònia d’inauguracion dera Finau deth Grand Prix ISU Barcelona 2014, que combinèc eth patinatge sus gèu damb un espectacle de vidèo mapping es tres dimensions.

Un cant a un futur de solidaritat entre es cultures ath costat deth Mediterrani servic entà dar eth trèt de gessuda ara Finau deth Grand Prix. Era istòria d’ua gota d’aigua e eth sòn viatge deth gèu e era nhèu ara mar, condusida en aguesta ceremònia peth director Lluïs Danés, damb musica de Xavi Lloses e coreografia de Patrick Capmartin, amiada a tèrme pes patinadors Tòn Cónsul e Irene Manau damb era ajuda d’ua projeccion de vidèo mapping era 3D qu’a aumplit de color e formes extraordinàries era pista de gèu barcelonesa.

Eth vicesindic e conselhèr d’Espòrts d’Aran, Luis Carlos Medina, a manifestat “ei un aunor compdar damb era preséncia deth joen aranés Tòn Cónsul en un acte dera magnitud mondiau coma era inauguracion dera Finau deth Grand Prix ISU. Tòn represente valors coma er esfòrç e era superacion. Des deth Govèrn d’Aran mos sentem capinauti de veir eth creishement esportiu de Tòn Cónsul”.

Tòn, signèc enguan un convèni damb eth Conselh Generau d’Aran e Foment Torisme Val d’Aran entà promòir era destinacion toristica esportiua Val d’Aran peth mon, representada ena imatge e enes valors deth joen patinador, e der equip deth que hè part, mejançant eth patrocini institucionau.