Vielha, 27 d’abriu de 2018.- Er Espitau dera Val d’Aran a metut eth servici naui programes informatics destinadi ara melhora deth foncionament intèrn deth centre sanitari e ara melhora dera atencion des usatgèrs.

Era implantacion deth nau sistèma informatic permet integrar tota era informacion deth pacient en ua unica Istòria Clinica qu’ei accessible per part des professionaus autorizadi des de quinsevolh espitau o CAP (Centratz d’Atencion Primària) de Catalonha, e ath madeish temps, qu’es professionaus que trabalhen eth tot er encastre sanitari d’Aran ena gestion espitalària e d’atencion primària, poguen connectar-se damb es centres especializadi de referéncia en tot facilitar er escambi d’informacion sanitària e en tot evitar desplaçaments innecessaris ena poblacion.

Damb era implantacion des naui aplicatius informatics, es usatgèrs disposaràn d’accès telematic as espacis digitaus personaus de consulta damb es programes e-Consulta e La Meva Salut (LMS).

Damb er estrument de e-Consulta er usatgèr se connectarà via telematica entà sollicitar era programacion de visites o pròves complementàries.

Quan s’accedisque a La Meva Salut poderà consultar es donades includides ara sua Istòria Clinica: resultats, analitiques e d’autes exploracions, informes, nauta d’Urgéncies e d’Espitalizacion.

Es usatgèrs tanben poderàn contactar damb eth sòn mètge abituau entà realizar consultes virtuaus.

Fin finau ei previst activar un sistèma entà arrebrembar es visites e pròves programades pendentes, e atau avertir via sms as usatgèrs pr’amor ac agen en compde.

Aguest nau sistèma informatic tanben facilitarà fòrça es comunicacions damb era Nauta Ribagòrça, dera que er Espitau dera Val d’Aran ei centre espitalari de referéncia.