• Dempús d’un long trabalh de recerca e valoracion per part des responsables deth laboratòri e dera direccion der Espitau Val d’Aran, s’a artenhut ua mashina e reactius entà melhorar era capacitat tà realizar PCR en Espitau

Era sindica d’Aran, Maria Vergés, a visitat aué eth laboratòri der Espitau Val d’Aran, a on dejà an arribat era mashina PCR e es reactius qu’an d’ajudar a melhorar era capacitat entà realizar aguest tipe de pròves en pròpri Espitau e redusir un shinhau eth temps de demora entà obtier es resultats.

“Dempús de fòrça mesi cercant solucions entà auer aguesti recorsi tant de besonh entath nòste territòri, auem artenhut un acòrd damb un laboratòri extèrn entà realizar aguestes pròves en Espitau Val d’Aran”, afirmaue era sindica d’Aran que, totun higie que: “ei de besonh destacar que tot e que melhoram era nòsta capacitat seguiram enviant mòstres tar Espitau Arnau de Vilanova, pr’amor que, per ua question de recorsi, non èm en condicions d’analizar totes es pròves que se realizen”.

Atau donc, tot e es dificultats que i a e que probablement i aurà, aguesti recorsi se higen as pròves d’antigens que dejà s’amien a tèrme e qu’agilizen es tempsi de demora de rastreig des contactes.