• Per prumèr viatge ena sua istòria, er Espitau Val d’Aran a artenhut que, damb aguesta aliança entre Aran Salut e eth Laboratòri de Referéncia de Catalunya, eth nòste sistèma de salut age accès a servicis de nauta especializacion, tecnologia e rapida responsa, disponibilitat de professionaus qualificats, atau coma un ampli catalòg de pròves en fòrça airaus de coneishement, melhorant atau de forma substanciau era atencion sanitària e sociau ena Val d’Aran

D’aguesta primauera ençà, er Espitau Val d’Aran forme part des laboratòris der hilat deth Laboratòri de Referéncia de Catalunya (LRC) gràcies ara aliança d’Aran Salut damb aguest centre, ua entitat participada peth Consòrci de Salut e Sociau de Catalunya e per Hospital del Mar, damb qui Aran Salut manten tanben ua aliança estrategica en airaus tant destacadi coma eth dera oncologia.

Formar part der hilat deth Laboratòri de Referéncia de Catalunya permet ar Espitau Val d’Aran auer accès as sòns servicis centraus, entre eri es servicis d’anatomia patologica e diagnostic pera imatge, atau coma compdar damb un especialista d’analisi clinics. Atau madeish, li permet mantier ua cobertura legau e supòrt tecnic deth LRC es 24 ores deth dia, 365 dies ar an.

Era sindica d’Aran, Maria Vergés, manifestaue que “aguesta aliança damb eth Laboratòri de Referéncia de Catalunya, amassa damb era aliança estrategica damb eth Hospital del Mar, mos permeten, ath delà de facilitar er accès a servicis de nauta especializacion, disposar de professionaus qualificats que balhen supòrt as nòsti professionaus que dejà amien a tèrme un trabalh remercable” e higie que “aguest ei un important pas entà deuant entà melhorar e consolidar eth nòste sistèma sanitari e sociau que mos permet auer a disposicion servicis dirèctaments connectadi damb espitaus e centres de referéncia dera rèsta de Catalunya”.