• Aguest barrament arribe dempús de qu’eth darrèr pacient der Espitau Val d’Aran ingressat per COVID-19 recebesse ager era alta ospitalària

Pendent eth dia d’ager, eth darrèr pacient ingressat per coronavirus en Espitau Val d’Aran recebec era alta ospitalària, motiu peth quau er Espitau a barrat dejà era planta de COVID-19, a on an restat ingressadi es pacients afectats peth virus es darrèri mesi. Totun, er Espitau resèrve era zòna d’ingrès sociosanitari entàs possibles casi que poguen aparéisher.

Des deth passat mes de març, s’an confirmat en Aran 125 casi de COVID-19, 90 a trauès dera pròva PCR, qu’identifique era infeccion, e 35 mès a trauès des test serologics aqueridi peth Conselh Generau d’Aran, e que detecten era immunitat.

Rebrembam que, pendent era crisi sanitària, eth govèrn deth Conselh Generau d’Aran a informat puntuaument de toti es casi positius confirmadi a trauès des pròves PCR e test serologics. Pendent es darrères setmanes, eth nombre de comunicats emetuts pera administracion sus es casi de COVID-19 en Aran a anat disminuint a mesura que se redusie tanben eth nivèu de contagis e, per tant, es positius confirmadi. Tot e açò es servicis d’atencion primària encara amien a tèrme eth control de diuèrsi pacients en isolament domiciliari que presenten simptomatologia lhèu compatible damb COVID-19.