• Gràcies ara inversion realizada pera Deputacion de Lhèida, eth Conselh Generau d’Aran a podut renauir eth TAC der Espitau, ua actuacion urgenta e fòrça de besonh pr’amor qu’er anterior se trapaue dejà en un auançat estat d’obsolescéncia tecnologica

Eth Conselh Generau d’Aran, gràcies ath supòrt economic dera Deputacion de Lhèida, a renauit eth TAC der Espitau Val d’Aran, ua sustitucion qu’ère fòrça de besonh pr’amor qu’enquiara se disposaue d’un  aparelh TAC que dejà non podie realizar es pròves damb qualitat sufisienta entà desvolopar es prètzhèts assistenciaus que realize eth centre medic.

“Un nombre elevat de mashines deth nòste espitau se trapauen en situacion d’obsolescéncia tecnologica pr’amor dera manca d’inversion pendent es darrèri ans, per aguest motiu, eth govèrn aranés sollicitèc eth supòrt dera Deputacion de Lhèida entath sòn renauiment”, afirmaue era sindica d’Aran, Maria Vergés.Eth Conselh Generau d’Aran recebèc un ajut de 326.700 euròs dera Deputacion entath renauiment d’equipaments medics en Espitau Val d’Aran. 234.000 an anat destinadi entara equipa TAC e era rèsta entà ua incobadora de transpòrt.

Era sindica a volut “arregraïr eth supòrt dera Deputacion en aguest ahèr tant primordiau entà poder melhorar era assisténcia sanitària des vesins e vesies dera Val d’Aran e dera Ribagorça, atau coma de toti es vistants que recebem ath long der an”.

Eth nau TAC ei un aparelh de darrèra generacion que mòstre damb fòrça claritat tot tipe de teishits e que permet obtier imatges de nauta qualitat, en tot facilitar atau un diagnostic dera patologia fòrça precís. Permet diagnosticar problèmes coma malauties vasculares, infeccions, traumatismes, transtorns muscoloesqueletics e cancer, atau coma hèr-ne un seguiment e planificar eth tipe de tractament medic o quirurgic e era sua responsa.

Vielha, 11 de junhsèga de 2022