• Es usatgèrs qu’atau ac desiren receberàn a trauès d’un SMS o un correu electronic era informacion sus es programacions des visites e pròves mediques

• Damb aguest nau sistèma se melhore en grana mesura era privacitat des donades personaus ena comunicacion d’aguesta informacion atau coma era eficàcia ena programacion des visites e pròves mediques

Er Espitau Val d’Aran compdarà damb un nau servici d’avisi per SMS o email entà rebrembar as usatgèrs es sues cites programades. Aguesta naua formula, supause un auanç, non sonque tecnologic, senon tanben per çò que hè ara confidencialitat dera informacion, pr’amor qu’es pacients receberan era sua informacion d’ua manèra discrèta e dirècta.

En aguesta prumèra fasa d’implantacion d’aguest projècte, es usatgèrs receberàn confirmacion a trauès deth canau que preferisquen e, mès endeuant, poderàn respóner aguesti messatges entà confirmar, cambiar o anullar es sues cites.

Totun, entà poder accedir ad aguest nau sistèma de comunicacion e pr’amor dera Lei Organica 3/2018, de Proteccion de Donades, es usatgèrs auràn de dar eth sòn consentiment entà qu’er Espitau pogue emplegar es sues donades telefoniques.

Atau donc, es persones interessades en poder gaudir d’aguest servici  auràn d’apropar-se tar Espitau Val d’Aran e signar eth document de consentiment de tractament de donades atau coma escuélher eth canau peth que vò recéber aguestes notificacions.

Era vicesindica prumèra e conselhèra d’Igualtat, Salut e Benèster deth Conselh Generau d’Aran, Maria Vergés, declaraue que “aguest ei un pas fòrça important entà melhorar ena atencion ath pacient der espitau Val d’Aran” e higie que “damb aguest nau sistèma tanben pretenem agilizar es passi qu’an de realizar es usatgèrs entà comunicar-se damb er Espitau”.