• Aguesta tecnica pionèra a permetut revisar era capacitat auditiva d’ua pacient en Espitau Val d’Aran a trauès deth servici d’Otorrinolaringologia deth Hospital del Mar, en tot estauviar atau desplaçaments entà Barcelona e garantint era qualitat deth seguiment que se hè ara pacient

• Era aliança estrategica entre er Espitau Val d’Aran e eth Hospital del Mar, artenhuda peth Conselh Generau d’Aran ena legislatura 2007-2011, permet ath nòste sistèma sanitari compdar damb especialistes de prumèr nivèu e garantir ua nauta qualitat assistenciau as nòsti pacients

Aguest maitin, en Espitau Val d’Aran s’a realizat era prumèra audiometria a distancia a ua pacient. Era pròva a estat realizada a trauès der equip deth Servici d’Otorrinolaringologia deth Hospital del Mar de Barcelona, liderat pes doctors Zenaida Piñeiro e Gabriel Pedemonte damb es audiologues Julieta de Ochao e Rosa Maria Sabater e er equip d’Infermeria der Espitau Val d’Aran Isabel Lorente, Pilar Cos e Maite Cortés.

Aguest ei un metòde pionèr d’avaluacion dera audicion entre es centres espitalaris, que permet eth diagnostic e seguiment des pacients en sòn centre de referéncia sense eth besonh de trasladar-se tà Barcelona.

“Deth Conselh Generau d’Aran ençà credem que mantier aguesta aliança estrategica deth nòste Espitau damb eth Hospital del Mar, artenhuda ena legislatura de 2007 a 2011, ei fòrça important entara Val d’Aran, pr’amor que mos permet compdar damb especialistes de prumèr nivèu e poder aplicar tecniques coma aguesta audiometria verbau de nauta freqüéncia telematica a trauès d’ua tecnologia qu’evite qu’es nòsti pacients s’agen de desplaçar entà auer un diagnostic”, explicaue era sindica d’Aran, Maria Vergés.

Era audiometria a distancia s’a realizat gràcies ar equip Audixi 10 dera empresa Kiversal, pensat entà realizar aguest tipe de controtles de forma telematica. Aguest sitèma aufrís es maximes garanties de diagnostic, pr’amor qu’es especialistes plaçadi en Hospital del Mar pòden veir a temps reau es reaccions des pacients e, damb era collaboracion in situ der equip d’Infermieria der Espitau Val d’Aran, pòden amiar a tèrme tot tipe d’audiometries mès especifiques que permeten evaluar era sua salut auditiva e eth nivèu d’escota, abastant totes es freqüéncies tonaus e verbaus. Aguestes pròves faciliten ar equip d’otorrinolaringologia determinar er estat deth pacient e es possibles solucions ara sua patologia, sigue cirurgia o era possibilitat d’ua pròtesi auditiva.