• Atau ac a anonciat eth secretari generau tath Rèpte Demografic, qui, acompanhat dera sindica d’Aran e eth subdelegat deth govèrn en Lleida an presentat aguest meddia es ajuts europèus concedits per Estat ara Val d’Aran.

• Aran a artenhut mès de 2,5 milions d’euròs entà desvolopar diuèrsi projèctes de renauiment energetic der enlumenat public e projèctes de melhora dera eficiéncia energetica en municipis coma Canejan, Vilamòs, Les e Vielha e Mijaran.

• Era maxima institucion aranesa signarà un convèni damb eth Ministèri entara Transicion Ecologica e eth Rèpte Demografic entara cession dera bastissa d’òbres publiques de Vielha, qu’a demorat en desús pendent fòrça ans, en tot arténher atau qu’eth Conselh Generau compde damb un equipament que pogue acuélher un espaci de coworking e de dinamizacion dera activitat economica e empresariau, vinculat damb eth HUB d’innovacion HèPic.

Aguest meddia a auut lòc ua presentacion, per part dera sindica d’Aran, Maria Vergés, eth secretari generau entath Rèpte Demografic, Paco Boya, e eth subdelegat deth govèrn en Lleida, José Crespín, des ajuts europèus concedits per Estat en Aran.

“Es acòrds qu’auem artenhut damb era administracion der Estat, coma er artenhut ena melhora dera carretèra N230 o era innovacion, entre d’auti, ei vitau entà perméter impulsar ara Val d’Aran a trauès d’accions coma era creacion deth Hub d’Innovacion en territòris de montanha, eth Plan de Sostenibilitat Toristica, era apòsta pera innovacion e era retencion deth taent joen era melhora des comunicacions”, afirmaue era sindica d’Aran ena sua intervencion.

Era Val d’Aran a artenhut mès de 2 milions e miei d’euròs entà diuèrsi projèctes de renauiment energetic der enlumenat public en Canejan, Vilamòs, Les e Vielha e Mijaran, atau coma un projècte de melhora dera eficiéncia energetica deth Palai de Gèu de Vielha, tres projèctes entà melhorar era eficiéncia energetica dera Escòla Alejandro Casona, era Aubèrja Matacabòs e era bastissa d’equipaments de Les, e un mès entara melhora dera eficiéncia energetica dera bastissa der Ajuntament de Vilamòs.

Atau madeish, pendent aguest acte, eth secretari generau, Paco Boya, a anonciat tanben qu’era maxima institucion aranesa signarà un convèni damb eth Ministèri entara Transicion Ecologica e eth Rèpte Demografic (Miteco) entara cession dera bastissa d’òbres publiques de Vielha.

En aguest sens, eth secretari generau entath Rèpte Demografic manifestaue que: “aguest edifici se trape en desús de hè fòrça ans ençà e era cession per part deth Ministèri, permeterà ath govèrn d’Aran compdar damb un equipament que pogue acuélher un espaci de coworking e de dinamizacion dera activitat economica e empresariau, vinculat ath HUB d’innovacion HèPic”. En aguest sens, era sindica d’Aran higie que: “ath delà, era cession d’aguesta bastissa permeterà tanben impulsar un projècte d’adaptacion urbanistica tà daurir un carrèr entre era Avenguda Castièro e era plaça deth Jutjat de Vielha, ath delà de dignificar e dinamizar eth centre deth pòble de Vielha dempús de que se hèsquen toti es tramits urbanistics de besonh”.

Tanben cau destacar que, dempús de fòrça mesi de trabalh deth Conselh Generau d’Aran e des autes administracions afectades estant, s’a artenhut dar responsa a ua peticion istorica deth territòri gràcies ath compromís der Estat entà desvolopar accions de melhora ena N-230, qu’a demorat sense cap tipe d’inversion pendent mès de 20 ans.

Enes darrèri mesi, s’a anonciat un contracte de servicis entara redaccion deth projècte de condicionament damb trams de tres carrils entre Benabarre e Sopeira, s’a licitat eth projècte de melhora en tram dera boca nòrd deth Tunèl enquia Vielha, e s’a hèt publica era aprobacion der estudi informatiu “Condicionament dera carretèra N-230 en sòn tram de Sopeira enquiara boca sud deth Tunèl de Vielha”.