• Es resultats der estudi anatomopatologic amiat a tèrme pera Universitat Autonòma de Barcelona (UAB) establissen que non se pòt determinar era causa dera mòrt, mès que non s’an observat indicis que hèsquen a suspectar d’un traumatisme per predacion

• Tot indique que i auec un consum post-mortem deth cadavre e ara se demoren es resultats der informe tafonomic, qu’ajudarà a determinar eth tipe de bèstia que consumic es rèstes

Eth 6 d’abriu eth Conselh Generau d’Aran recebec era denóncia d’un ramadèr per un possible atac d’os a un vedèth en Tredòs. Se remassèren mòstres entà hèr es pròves corresponentes entà poder determinar era causa dera mòrt.

Eth Servici d’Ecopatologia dera Fauna Sauvatja dera Factultat de Veterinària dera Universitat Autonòma de Barcelona (UAB) a emetut aué er informe preliminar des resultats der estudi anatomopatologic, qu’establís que: “non s’an observat herides perforantes damb emorràgies ena pèth o fractures de uassi que hèsquen a suspectar d’un traumatisme per predacion” e que “era preséncia d’edema soscutanèu enes quate extremitats e ena zòna laringau ei compatibla damb ua afectacion sistemica”.

Atau, donc, tot indique que i auec un consum deth cadavre post-mortem, e non i a cap d’evidéncia qu’aguest consum age estat per part der os. Totun, encara cau demorar er estudi tafonomic, qu’ajudarà a determinar eth tipe de bèstia que consumic eth cadavre.