Diuèrsi membres der Institut d’Estudis Aranesi-Académia Aranesa dera Lengua Occitana, an compareishut en Plen deth Conselh Generau d’Aran entà balhar compdes sus er estat actuau dera constitucion der IEA en Académia. En aguest sens, er organisme compde damb un Conselh Permanent format per: Jusèp Loís Sans coma president, Angelina Cases coma vicepresidenta, Rosa Maria Salgueiro coma secretària e Miquèu Segalàs coma vocau, toti eri presents ena session.

Ara madeish, era Académia ei formada provisionauments per 15 membres dividits en dues seccions: 10 ena seccion aranesa, qu’a era autoritat sus era normativa lingüistica, era toponimia e era onomastica araneses, e 5 ena seccion standard,  d’aconselhament sus era unitat dera lengua occitana e eth tronc común. De totes manères, era Académia poderie arribar a un totau de 21 membres, pr’amor que i a era possibilitat de que i pogue auer naui academics e que se incorpòren naues seccions ara Académia. I poderà auer membres corresponents e onorifics e tanben poderà auer-i societats filiaus e entitats corresponentes.

Pendent era session se remarquèc quines son es foncions basiques dera Académia, des quaus poderiem suslinhar: establir e actualizar era norma lingüistica dera varietat aranesa der occitan e velhar per qu’eth procés de normativizacion d’aguesta lengua sigue coerenta per tot eth sòn encastre lingüística, e ei era autoritat entar assessorament que, en matèria de lengua occitana, li sigue sollicitat pes administracions publiques e es organismes que’n depenen, e tanben pes centres d’ensenhament públics e privats e pes mieis de comunicación de titularitat publica, d’acòrd damb er article 4 dera Lei 35/2010, d’1 d’octobre, der occitan, aranès en Aran.

Ath delà, era condicion de membre der IEA-AALO ei vitalícia. Es cargues son escuelhuts entà un periòde de quate ans e sonque se poderàn renauir en ua reelección. Entà préner possession de quinsevolh cargue ei imprescindible era lectura d’un discors d’entrada. Ara manque sonque elaborar un Reglament de Regim Intèrn entà que se pogue trebalhar damb totau normalitat.

Eth Plen deth Conselh Generau d’Aran amassat en session ordinària a acordat per unanimitat era incorporacion deth Conselh ath Patronat Catalunya Món – Consell Diplomàcia Pública de Catalunya (PCM – DIPLOCAT). Eth PCM – DIPLOCAT ei un consòrci public-privat dessenhat entà fomentar eth dialòg e bastir relacions entre Catalunya e era rèsta deth mon.

En paraules deth Mgfc. Sindic d’Aran, Carlos Barrera, “damb aguest acòrd, qu’a d’èster ratificat peth plenari deth PCM-DIPLOCAT, auem era oportunitat de dar a conéisher era realitat e singularitat d’Aran, era sua cultura e es sues institucions a tot eth mon”.

En aguest madeish acòrd s’a designat ath Vicesindic Prumèr d’Aran, Mgfc. Sr. Luis Carlos Medina, coma representant deth Conselh Generau en aguest consòrci.

D’aute biais, en aguesta madeisha sesion plenària s’a aprovat damb es vòts favorables deth grop de CDA e era abstencion des grops d’UA-PSC e deth PRAG, eth compde generau deth Conselh Generau, des sòns organismes autònoms, des sues societats mercantiles e dera sua entitat empresariau corresponent ar exercici 2013.

En ua auta orde de causes, eth Sindic d’Aran, Carlos Barrera, a balhat compde ath Plen deth Conselh Generau d’Aran des actuacions de restitucion des marges e de retirada des rèstes vegetaus entà que se recupère eth cors fluviau der arriu Garona, qu’era CHEbro a previst realizar abantes dera finalizacion d’aguest 2014.