Vielha, 2 de gèr de 2019.- Er IEA-Acadèmia aranesa dera lengua occitana a presentat aué en Conselh Generau d’Aran quate naues publicacions en lengua aranesa que son frut deth trabalh realizat pendent er an 2018.
Era presentacion a anat a cargue deth sindic d’Aran, Carlos Barrera e deth president der IEA-AALO, Jusèp Loís Sans, acompanhadi dera conselhèra de Torisme e Desvolopament Economic d’Aran, Anna Díaz, e des membres dera Acadèmia aranesa, Jèp de Montoya, Rosa Mª Salgueiro e Angelina Cases.
Es quate naues publicacions son: “Vocabulari ortografic der aranés” (varianta occitana); “Vocabulari fonetic basic der aranés” (varianta occitana); “Es vèrbs en aranés” (varianta occitana); e “Vocabulari d’espòrts d’iuèrn” (varianta aranesa dera lengua occitana) que n’ei autora Lourdes España.
Eth sindic d’Aran, Carlos Barrera, a destacat pendent era presentacion qu’aguestes naues publicacions rebaten eth trabalh hèt des dera Acadèmia aranesa pendent er an 2018 en pro dera lengua e dera cultura aranesa, que hè qu’an darrèr an ja se pogue parlar damb tota normalitat der aranés coma lengua pròpria d’Aran.
Pera sua part, Jusèp Loís Sans, arregraïc en prumèr lòc era ajuda qu’er IEA arrecep deth Conselh Generau d’Aran e a destacat que 2018 a estat un an especiuaments productiu donques s’a trabalhat sustot ena varianta aranesa dera lengua occitana damb era publicacion d’aguestes naues quate òbres. Sans, expliquèc que, en cas deth Vocabulari d’espòrts d’iuèrn er Institut a compdat damb era collaboracion de Baqueira Beret, ath delà dera deth Conselh Generau d’Aran, era Generalitat de Catalonha e era Òbra Sociau “la Caixa”.
Eth president der IEA-AALO, a destacat tanben qu’enes pròplèus mesi se publicarà eth “Diccionari Aranés” un document de 470 pagines dempús deth convèni signat hè dus ans damb eth Conselh Generau d’Aran, e era “Gramatica der occitan estandard” ua òbra qu’a definit coma d’absolut besonh donques que hè part d’un territòri de 16 milions de persones e qu’utilizen mès de 450 professors universitaris en tot eth mon.
Per d’auta part, cau arrebrembar que des deth 1 de gèr ja se pòt descargar online a trauès dera pagina web der IEA, Anna Karenina de Leon Tolstói, arrevirat ar aranés qu’aparten ara colleccion d’òbres dera literatura internacionau entara sua difusion, damb er objectiu que siguen utils entara lengua occitana. Es òbres se penjaràn ena web eth prumèr dia de cada mes, a arrason d’ua per mes, e includiràn Guèrra e Patz deth madeish autor; Eth Latzèret de Tormes, anonim; Es frairs Karamazov e Crim e castig de Fiòdor M. Dostoievski, Eth Buscon de Francisco de Quevedo; Era Gitaneta, Era illustra serventa, Eth gelós extremenh e Rinconete e Cortadillo de Miguel de Cervantes; Condes de Hans Christian Andersen; Es aventures de Tom Sawyer de Mark Twain; e Es Miserables de Victor Hugo.
Era publicacion d’aguestes òbres se harà jos eth títol de “Colleccion Antoni Nogués” qu’ei er autor des arrevirades.