Vielha, 1 de deseme de 2017.- A compdar deth deluns 4 de deseme, comence era sason d’iuèrn en Hilat deth Musèu dera Val d’Aran, qu’enguan inauguram damb activitats fòrça nauères entà toti es publics.
“Musèus d’Aran, tot er an” ei eth lèma d’aguesta naua campanha qu’iniciam damb er objectiu de promòir era visita deth nòste patrimòni culturau pendent totes es sasons der an. Aguesta naua sason d’iuèrn pren eth relèu as diuèrses activitats amiades a tèrme en 2017 (Dia dera Poesia, visites teatralizades, etc). Ues activitats qu’an agut fòrça bona acuelhuda tant per part deth public locau com deth public de dehòra.
Valle de Aran 2009
Començam er iuèrn en tot mantier dubèrti es nòsti musèus: Musèu dera Val d’Aran de dimars a dissabte de 10h a 13 h e de 17 h a 20 h, e dimenges e festius de 10 h a 13 h, er Ecomusèu çò de Joanchiquet de Vilamòs de dimars a dissabte de 11 h a 14 h e de 16 h a 18 h, e dimenges e festius de 11 h a 14 h. Ath delà pendent tot aguest mes de deseme e enquiath 27 de gèr de 2018 tanben se pòt visitar era exposicion “Paisatges ena taula” deth Hilat de Musèus d’Etnologia de Catalunya, ena glèisa de Sant Joan d’Arties. Er orari ei de deluns a dissabte de 17 h a 20 h. Per un aute costat, dehòra deth Hilat deth Musèu dera Val d’Aran tanben se poderàn visitar eth Musèu dera Nhèu d’Unha, de deluns a dimèrcles de 10 h a 13h e de dijaus a dissabte de 17 h a 20h, e eth PyrenMuseu, de deluns a dimenge de 10:30 h a 13:30 e de 17:00 a 19:30 h.
Eth Musèu dera Val d’Aran tanben auferís pendent tota era sason eth servici de visites guidades ara Fabrica dera lan e Rota Romanica d’Aran. Era Fabrica dera lan se poderà visitar toti es dimèrcles entàs 12 h damb ua visita guidada, a on coneisheram com aguesta fabrica supausèc ua revolucion e ua descarga enes ahèrs domestics des hemnes araneses. Entàs amants deth romanic vos tornam a apropar tara Rota Romanica d’Aran, a trauès dera visita guidada a Santa Maria d’Arties e Santa Eulària d’Unha, toti es dijaus entàs 11:30 h damb resèrva per auança en telefòn deth Musèu 973 64 18 15.
Es nauetats dera sason son es diuèrses activitats adreçades tant ath public generau com ath public infantil que s’amiaràn a tèrme pendent eth Pònt dera Purissima, Nadau e Setmana Santa. Coïncidint damb er An dera Gastronomia en Musèu dera Val d’Aran e era exposicion “Paisatges ena taula” dera glèisa de Sant Joan d’Arties, era prumèra des activitats serà “Era Taula deth governador”. Se tracte d’un sopar teatralizat a on eth nòste anfitrion, eth senhor governador d’Aran, mos convide a compartir era sua taula, e a conéisher era gastronomia tradicionau aranesa. Era activitat ei limitada a 3 sessions programades entàs dies 7, 9 e 29 de deseme de 20 a 22 h, en Sant Joan d’Arties. Eth prètz deth sopar ei de 30 € per persona e era venda d’entrades serà per auança en Musèu dera Val d’Aran. Era activitat ei limitada a 25 pers. e recomanada entà majors de 16 ans.
En tot continuar damb es activitats programades, en marc d’aguesta exposicion s’an premanit 2 talhèrs e un vrespalh adreçadi ath public infantil. Eth prumèr talhèr ei “Nhacs artistics” un talhèr d’art damb es aliments coma protagonistes. Un talhèr que recuperam e tornam a méter en marcha dempús der èxit qu’a agut ena V Exposicion Collectiva d’Artistes d’Aran-David Beso. Era activitat se realizarà eth dimèrcles 27 de deseme entàs 18 h.
Per un aute costat auem premanit un dusau talhèr damb eth nòm “Pintxos Artistics”. Un talhèr de codina creativa entà mainatges, a on montaràn ua presentacion culinària originau e divertida qu’eri madeishi poderàn degustar. Eth talhèr se realizarà eth dimèrcles 3 de gèr entàs 18 h.
E entà acabar es activitats infantils de Nadau, “Eth vrespalh deth governador”. Eth nòste governador convide as mès petiti de casa a un bon vrespalh. Tà lecar-se es dits! Eth dijaus, 4 de gèr, entàs 17:15 h.
Damb era etiqueta #museusdarantoteran vos convidam a vier e participar activament deth nòste patrimòni culturau.